Kohler-Barnard terug in die DA

Dianne Kohler-Barnard

Dianne Kohler-Barnard se skorsing uit die Demokratiese Alliansie (DA) is Dinsdagmiddag opgehef.

ʼn Paneel van vyf het Dinsdag Kohler-Barnard se appèl teen haar skorsing aangehoor en daarna aangekondig dat sy weer tot die party mag terugkeer met sekere voorwaardes.

“Sy moet bedank uit al haar posisies in die party, buiten haar setel in die Nasionale Vergadering,” het Glynnis Breytenbach, voorsitter van die DA se Federale Kommissie, gesê.

Die voorwaardes sluit in dat sy vir die res van haar parlementêre termyn nie aan enige oortredings skuldig bevind word nie; sy ʼn boete van R20 000 aan ʼn nie-regeringsorganisasie betaal; en dat sy versoening en restitusie onder voorheen benadeelde persone sal bevorder.

Maroela Media het vroeër berig Kohler-Barnard se lidmaatskap is in Oktober opgeskort nadat sy skuldig bevind is aan wangedrag. Dit kom nadat sy ʼn inskrywing van Paul Kirk, ʼn joernalis, op haar Facebook-blad gedeel het waarin hy onder meer geskryf het: “Hierdie is ʼn blêddie sirkus. Kom asseblief terug PW Botha. Jy was by verre eerliker as enige van hierdie ANC skurke.”