Komediant twiet steeds vir Steve ondanks hofbevel

Conrad Koch, komediant en buikspreker agter die karakter Chester Missing, het Donderdag voortgegaan om twiets te stuur oor Steve Hofmeyr nadat die sanger ʼn tydelike beskermingsbevel teen hom gekry het.

Koch het Donderdag reaksie gelewer op ‘n twiet wat Hofmeyr Maandag uitgestuur het:

Haha. Stevo, I am gonna burn u for this one. RT @steve_hofmeyr The ANC created "white" by creating a new victim based on skin colour post 94

— Chester Missing (@chestermissing) November 6, 2014

Hofmeyr het Woensdag die beskermingsbevel in die Randburg-landdroshof bekom waarvolgens Koch hom nie “verder mag teister, sy borge of vennote kontak of bykomende lasterlike of kwetsende aanmerkings oor hom publiseer nie”.

Beeld het Donderdag berig Koch het gesê hy het ʼn telefoonoproep gekry rakende die hofbevel, maar het dit nog nie ontvang nie. Hy het gesê dit is “fundamenteel” verkeerd om regsaksie teen ʼn satirikus te neem.

“Dit is absoluut mal. Steve spoeg rassistiese gal. As hy uitgedaag word, tree hy verwaand op,” het Koch aan die koerant gesê. “Al wat ek gedoen het, was om te twiet. Die prys van sy rassisme kom nou terug na hom toe.” Volgens Beeld het Koch gesê sy twiets oor Hofmeyr is nie haatspraak nie, aangesien hy nooit iets haatvol gesê het oor die sanger of vir mense gesê het om sy borge of die fees [Afrikaans is Groot] te boikot nie.

Klik hier vir vorige berigte oor die aangeleentheid.