Kommissaris versoek om Lesufi-uitlatings te ondersoek

lesufi-deur-ana-2019-03-11

Panyaza Lesufi, die Gautengse LUR vir onderwys. Foto: ANA.

In die eerste van ʼn reeks stappe teen Panyaza Lesufi, die Gautengse LUR vir onderwys, het die VF Plus Dinsdag ʼn amptelike versoek aan die Gautengse wetgewer se integriteitskommissaris gerig om sy onlangse uitlatings teen wit leerlinge te ondersoek.

Anton Alberts, woordvoerder van die VF Plus, het gesê die party grond sy klagte op die minagting van die Suid-Afrikaanse Grondwet wat enige vorm van rassisme verbied, en twee klousules van die Gautengse wetgewer se gedragskode wat bepaal wetgewerlede moet die amp wat hul beklee waardig wees en dat hulle altyd eerbaar en met integriteit moet optree.

“Lesufi se kwetsende verwysing verlede week na wit skoolkinders as ‘klein basies’ voor ʼn gehoor waar hy sy departement se operasionele planne vir die jaar rakende moedertaalonderrig uiteengesit het, is onaanvaarbaar. Die term ‘klein basies’ is duidelik ʼn verwysing na die apartheidsera. Nie alle Afrikaners het die gebruik van sulke terme goedgekeur nie en dit kan beskou word as ʼn rassistiese praktyk waarmee weggedoen is in die nuwe demokratiese bedeling,” het Alberts verduidelik.

“Alle Suid-Afrikaners het 25 jaar gelede ʼn nuwe era van samewerking en gelykheid omarm. Om daarom na ‘n wit persoon of ʼn Afrikaner as ‘baas’ of ‘kleinbaas’ te verwys, is ‘n etikettering van hulle as rassisties, wat ‘n baie ernstige aanklag is. Lesufi het deur sy uitlatings alle wit kinders en in die besonder Afrikaners – in die konteks van sy eie verwysings na Afrikaanse skole – as rassiste gebrandmerk.”

Alberts sê die waarheid is dat Lesufi wil aanhou om apartheid te gebruik as meganisme om wittes te straf deur Afrikaans te vernietig. “Dit terwyl daar meer bruin en swart sprekers van Afrikaans is as wittes.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
Andreas

Dis reg so, gee die man gas met als wat dit verg, ALS, hou nie ‘n duim terug nie: Hier is wat hy gesê het, so berig Beeld op 15 Junie. “As iemand sê: ‘Ek wil net in Afrikaans onderrig word’, sal ek dit toelaat. Ek sal jou ’n onderwyser gee om jou te onderrig, maar dit beteken nie die hele skool moet Afrikaans wees nie,” het hy gisteroggend op ’n inligtingsessie by Nasrec in Johannesburg gesê. “Jy kan na Blok A gaan vir Afrikaans en ons sal na Blok B gaan vir Engels of Pedi in dieselfde skool sodat… Lees meer »

Erwee

Mnr Lesufi is ‘n man wat nie weet wat hy nie weet nie. Hy sal dit die dag uitvind as hy geweeg word en te lig bevind word. Hy is besig om die Afrikaans-sprekendes van alle rasse saam te snoer wat tot goeie gevolge sal lei. Tegnologie is aan ons kant en daar is genoeg entrepeneurs wat Afrikaanse moedertaal onderrig na hoer hoogtes gaan neem. Afriforum is besig met ‘n R4,5miljard plan en so sal die een na die ander begin deurkom. In die land van die blindes is die een-oog-koning-Lesufi

Manie

Hierdie is n gevaarlike rassis wat Afrikaans sal aanval om sy swak prestasie van nie skole bou weg te steek

Nelia van Zyl

Viva Anton Alberts! Dit is lankal tyd dat hierdie man , sg. LUR Onderwys, in die bek geruk en verantwoordelik gehou word vir sy kwetsende en beledigende op- en aanmerkings. Dit drup van rassisme. Hy is in die eerste plek nie ‘n onderwysmens nie. Hy weet van onderwys net mooi niks en hou hom doenig, as rassis, met opstokery en politiekery. Hy dra geensins die belange van alle kinders en onderwysers op die hart nie, versaak die onderwys in die oortreffende trap en is ‘n klaaglike mislukking. Vir die onderwys is hy ‘n totale verleentheid. Dit het lankal tyd geword… Lees meer »

Christo du Plessis

Sy onderrok hang elke keer ver uit. Dit gaan hom duur te staan kom.