Kommissie se kennisgewing nooit aan Watson bestel

Gavin Watson. (Foto: Bosasa)

ʼn Kennisgewing moes nog aan Gavin Watson, grootbaas van die Bosasa-groep, bestel word vir hom om sy weergawe rakende beweerde korrupsie by dié maatskappy voor die Zondo-kommissie te gee.

Watson is Maandag in ʼn motorongeluk op die R21 naby die Internasionale Lughawe OR Tambo dood. Die voertuig het teen ʼn betonpilaar van ʼn brug oor die snelweg gebots en Watson is op slag dood.

Adjunkhoofregter Raymond Zondo, voorsitter van die kommissie wat staatskaping ondersoek, het Woensdag gesê hy het ʼn kennisgewing, soos deur die kommissie se reëls bepaal, uitgereik om aan Watson te bestel, maar dit is ten tyde van sy dood nog nie gedoen nie.

Die toneel van die ongeluk waarin Gavin Watson gesterf het. (Foto: Facebook)

Volgens Zondo het die kennisgewing Watson nie verplig om dadelik voor die kommissie te verskyn nie, maar eerder vereis dat hy ʼn beëdigde verklaring indien rakende Angelo Agrizzi, voormalige bedryfshoof van Bosasa, se verklaring.

Agrizzi het in dié verklaring beweer dat Watson die meesterbrein agter die maatskappy se verdagte kontrakte van miljarde met die regering was.

Pogings is wel aangewend om die kennisgewing aan Watson te bestel, maar dit is egter nie voor sy dood uitgevoer nie, het Zondo verduidelik.