Kommissie vir Geslagsgelykheid ondersoek klag teen Ndlozi

EFF-woordvoerder Mbuyiseni Ndlozi. (Foto: Facebook)

Die Kommissie vir Geslagsgelykheid (KGG) ondersoek ʼn formele klag teen dr. Mbuyiseni Ndlozi, die EFF se nasionale woordvoerder, nadat hy na bewering die teistering van ʼn vrouejoernalis verlede week buite ʼn Clicks-winkel verdedig het.

Ndlozi is gekap ná hy in ʼn inskrywing op sy Twitter-rekening geskryf het “om bloot aan haar te raak, is nie teistering nie”.

Dié opmerking is gemaak in die lig van ʼn video op sosiale media waarin ʼn mens kan sien hoe Nobesuthu Hejana, ʼn joernalis by eNCA, verlede Dinsdag deur ʼn groep mans, vermoedelik betogers van die EFF, gestamp word.

Hejana het die betrokke dag verslag gelewer oor een van die betogings buite ʼn Clicks-winkel in Kaapstad ná ʼn omstrede advertensie vir haarprodukte op Clicks se webwerf wat as rassisties teenoor swart mense bestempel is.

Ndlozi het intussen om verskoning gevra vir die omstrede twiet, asook erken dat dit onverantwoordelik was en die indruk wek dat gewelddadige optrede teen vroue aanvaarbaar is.

“Dit was ook kwetsend en het baie mense wat reeds weens geweld gely het, daardie pyn laat herleef,” het Ndlozi in nog ʼn inskrywing geskryf.

Die KGG sê hy neem kennis van Ndlozi se verskoning.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

14 Kommentare

jongste oudste gewildste
Renata

Was daar al ooit iets wat die EFF kwytgeraak het wat opbouend en sinvol was….kort-kort kom die werklike sienings van EFF lede na vore en dan moet daar vinnig wal gegooi word. Hou liewer op huigel, die hele land weet hoe verrot julle is.

Nie Verbaas

Wel ek glo nie die knaap ken eers die verskil tussen arrogansie en onnosel nie.

Snowball

Die rooi petjies toon geen respek vir enige iemand nie, vir wat sal dié een respek hê vir vrouens?
Die ware karakter is glashelder vir almal om te aanskou.

4ntj13

So asof sy verskoning nou sy aanvanklike uitlating kan regstel! Jy kan nie die hoender se vere terugsit nadat jy dit gepluk het nie! Dis hoog tyd dat daar in elk geval konsekwensies is na sulke uitlatings. Klomp mense dink nou geweld teen vrouens is geregverdig deur EFF leierskap. Verskonings kan dit nie verander nie.

Werner

Hoekom mors julle julle tyd om daaroor te berig ons weet mos hy gaan niks oorkom nie