Konstabel koelbloedig aan diens vermoor

Konst. Pieter de Lange en sy vrou, Nelmarié. Sy het vanoggend by dié foto van hulle op Facebook geskryf: “Hy is my lewe en my hart. Sonder hom is ek niks.” Foto: Facebook

Genl. Khehla John Sitole, nasionale polisiekommissaris, het die hoop uitgespreek dat die mans wat ʼn polisiekonstabel Donderdagaand doodgeskiet het, spoedig in hegtenis geneem sal word.

Konst. Petrus Gerhardus de Lange was aan diens waar hy ʼn beweerde dwelmtransaksie in Bulwayostraat, Ladanna, Polokwane, dopgehou het toe hy aangeval is, sê brig. Vishnu Naidoo, nasionale polisiewoordvoerder.

“ʼn Groep verdagtes in twee voertuie het na die voertuig aangery gekom waarin De Lange gesit het,” sê Naidoo. “Vier het uitgeklim en met handwapens op die polisieman begin skiet.”

Die 30-jarige lid van die Westenburg-polisiestasie is op pad hospitaal toe dood.

Naidoo sê luidens berigte is ʼn vragmotorbestuurder, wat verby die toneel gery het, deur ʼn dwaalkoeël in sy hand gewond tydens die skietery op De Lange.

Sitole het die moord op De Lange veroordeel en opdrag gegee dat ʼn 72-uur-aktiveringsplan in werking gestel word om die skuldiges vas te trek.

“Net sedert die begin van die huidige boekjaar het ons 42 polisiebeamptes aan die dood afgestaan,” het die kommissaris Vrydag gesê. “Ten spyte van ons proaktiewe en reaktiewe ingrypings bly die getal beamptes wat aangeval en doodgemaak word onaanvaarbaar hoog.”

Van die 42 beamptes wat sedert 1 April vanjaar vermoor is, was 18 ten tyde van hul dood aan diens en 24 van diens af.

Naidoo sê enigeen met inligting oor Donderdagaand se aanval in Polokwane kan Stop Misdaad bel by 08600 10111.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
Boet

Waar was sy makers hoe Kan daar net een op so saak gewees het dis soos die spreekwoord mos sê (Heros die young)

AmY

Dis baie tragies dat daar soveel polisiebeamptes vermoor word.

Herman

Slegs in SA. Ander lande sal nie sulke moorde op Polisie duld nie

honourable member

Dis so hartseer. Sterkte aan die familie.

Willie

Jy sal dit nie in ander lande durf waag nie