‘Koop ons inentings’ smeek Ramaphosa

Pres. Cyril Ramaphosa (Foto: Presidensie/Twitter)

Pres. Cyril Ramaphosa het Donderdag internasionale organisasies aangemoedig om Covid-19-entstowwe van entstofvervaardigers van Afrika te koop weens die lae vraag daarna op dié vasteland.

Ramaphosa het hierdie versoek gerig tydens ’n internasionale beraad waaraan onder andere pres. Joe Biden van Amerika en dr. Tedros Adhanom Ghebreyesus, direkteur-generaal van die Wêreldgesondheidsorganisasie (WGO), deelgeneem het.

Volgens Ramaphosa gee internasionale organisasies baie geld vir entstofvervaardigers van Afrika vir die aankoop en verkryging van entstowwe vir ontwikkelende ekonomielande, maar dan koop hulle nie entstowwe van hierdie vervaardigers nie.

“Dít, dames en here, moet verander,” het Ramaphosa tydens sy toespraak op die beraad gesê.

“Multilaterale agentskappe en filantropiese organisasies moet entstowwe van Afrika-entstofvervaardigers aankoop om te verseker dat die ontwikkelende vermoëns op die vasteland behou word.”

Maroela Media het verlede week berig oor die farmaseutiese reus Aspen, wat verlede jaar ’n ooreenkoms met die VSA-gebaseerde maatskappy Johnson & Johnson aangegaan het om die entstof vir pasiënte in Suid-Afrika en Afrika te vervaardig. Die ooreenkoms is in Maart gefinaliseer en proewe vir dié entstof, Aspenovax, duur sedert Januarie vanjaar.

Hierdie entstofvervaardiger het egter nog geen bestellings vir sy entstof gekry nie, al is Afrika die kontinent met die minste ingeëntes (16% van die bevolking).

Stavros Nicolau, senior uitvoerende hoof vir strategiese handelsontwikkeling, het gewaarsku indien Aspen geen Covid-19-entstofbestellings kry nie, sal daar duidelik geen rede wees om met die vervaardiging daarvan voort te gaan nie.

Die WGO het Donderdag gesê Suider-Afrika sien ’n oplewing in Covid-19-infeksies, met ’n toename van 32% in positiewe gevalle verlede week in vergelyking met die vorige week.

Teen Vrydagoggend is altesaam 3 871 085 bevestigde Covid-19-gevalle en 8 920 nuwe gevalle in Suid-Afrika aangemeld. Die jongste positiwiteitskoers is 23,1%.

Nog 21 sterftes is aangeteken, waarvan agt die afgelope 24 tot 48 uur bevestig is. Dit bring die algehele sterftesyfer op 100 630 te staan.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

29 Kommentare

jongste oudste gewildste
HJvdb

Ai tog Ramaphosa, niemand is verplig om iets by SA te koop nie…LOL

Hou tog op met die gedagte dat almal SA iets skuld!!!

Vraag en aanbod teen n aanvaarbare prys!

Trotse Boervrou

Siestog….

Henri

Dis ‘n uitgediende entstof vir ‘n ou variant van COVID. Dus is die entstof in elk geval nutteloos.

Jr

Koop asseblief, ons het nie meer geld vir Johnny Walker

Waarnemer

Selfs mede Afrika lande vertrou nie ons regering nie…..