‘Korrupsie in SAPD endemies’

mike-bolhuis-kykNet-verskaf

Mike Bolhuis. Foto: kykNET

Die private speurder Mike Bolhuis wat deesdae ook sy eie televisiereeks op kykNET het, sê oneerlike optrede in die Suid-Afrikaanse Polisiediens (SAPD) is alombekend, wydverspreid en het ʼn algemene ding geword wat daagliks plaasvind.

Hy eis nou dat die diens se top-struktuur begin om drastiese stappe teen korrupte lede te doen. “Korrupsie in die Suid-Afrikaanse Polisiediens is endemies.”

Bolhuis beweer dis veral die SAPD13-store van die polisie wat deurloop en leeg gesteel word. Bewysstukke wat later voor die hof moet kom word in verskeie polisiestore landswyd bewaar en word in ʼn amptelike register by elke stoor aangeteken. Slegs ʼn gemagtigde lid van die polisie mag bewysstukke in en uitteken, maar dís glo waar die korrupsie begin.

Verskeie sake het die afgelope tyd onder Bolhuis en sy span se aandag gekom en die een geval wil meer opportunisties as die ander wees. Die register waarin bewysstukke opgeteken is, word byvoorbeeld gemanipuleer om die werklike inhoud van die stoor te verbloem. Duplikaatsleutels word dan gemaak om toegang te verkry en selfs yskaste en televisiestelle het al so uit die polisiestore verdwyn.

Erger nog is die uitleen van wapens wat reeds in misdade gebruik is of vrywillig deur die lede van die publiek vir veilige bewaring ingehandig is. Bolhuis sê hy het bewyse dat so min as R500 vir ʼn 9mm-pistool en R2 000 vir ʼn outomatiese wapen betaal word wat deur korrupte polisiebeamptes vir ʼn uur of wat aan misdadigers verhuur word.

Wanneer daar op ʼn misdaadtoneel dalk op so ʼn wapen beslag gelê word moet die verbaasde oorspronklike eienaar verduidelik hoe sy geregistreerde wapen in die hande van ʼn misdadiger beland het.

Bolhuis sê hy is ook bewus van ʼn geval waarin kokaïen wat gestoor is met babapoeier vervang is. Die ware dwelm is verkoop lank voor die saak in die hof gekom het.

(Foto: SAPD)

Beëdigde verklarings word ook deur korrupte speurders uit dossiere verwyder en met valse afskrifte vervang wat so swak is dat die saak deur die hof uitgegooi word. Terug by die speurder word die oorspronklike verklaring weer in die dossier geplaas voor die saak afgesluit word. Die korrekte verklaring is dus beskikbaar indien iemand die uitspraak later bevraagteken.

Corruption Watch het vroeër berig dat daar kommerwekkende vlakke van oortredings in die SAPD is. Omkopery, magsmisbruik en pligversuim is hoog op die lys van klagtes wat in die laaste ses jaar deur lede van die publiek ingedien is. Vroue is die kwesbaarste en sake waarin vroue deur polisiemanne misbruik is, het ook gereeld voorgekom.

Speurders en ondersoekbeamptes is dikwels betrokke by die aanvaar van omkoopgeld en die misbruik van hul posisies. Gevalle waar polisiebeamptes met kriminele saamwerk was ook onder die oortredings wat deur sowat 1 400 lede van die publiek met die waghond teen korrupsie gedeel het.

Corruption Watch sê die hoë vlakke van korrupsie in die polisie sal aanhou sweer totdat daar op hoë vlak die wil is om teen oortreders in eie geledere op te tree.

Bolhuis stem saam en sê die top-bestuur doen weinig om korrupsie te beëindig, te voorkom of selfs te ondersoek, hoewel dit wyd bekend en diepgewortel is. “Selfs senior offisiere is betrokke en dit gaan uiters moeilik wees om dit om te keer. Dis ʼn klug, want aan die ander kant word daar gereeld vals klagtes teen onskuldige lede gelê om hulle uit die pad uit te kry.”

Verwysend na die kommissies van ondersoek wat tans aan die gang is sê Bolhuis hy is woedend dat wetstoepassing steeds nie plaasvind nie. “Dit het tyd geword dat aksie geneem word om Suid-Afrika die vooruitstrewende land te maak wat dit moet wees.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Wielspore

Hierdie tendens is glad nie nuut onder die SAP, ek verwys na ‘n SAP speurder, die enigste een vir ‘n klein Vrystaatse dorpie in die middel 1970’s. Word skuldig bevind aan onwettige wapen handel en diamant smokkelary, hy tree vroeg af, geen tronkstraf, opgeskorte vonnis.
Na sy “aftrede” het ‘n luukse huis gekoop en in weelde geleef tot sy afsterwe.

ne

Mooi so Bolhuis. Wat kan ons doen om die laaste paragraaf te laat waar word?

Leon

Vuurwapens wat ingehandig word vir vernietiging beland in die verkeerde hande. Jaggewere vind hulle pad na top offisiere en die gee dit weer vir wildstropers. ‘n Oorlede persoon wat renoster stropers gejaag het, het al jaggewere by stropers gekry wat ingegee was vir vernietiging wat sy pad gekry het deur ‘n hoëe polisie offisier na die stroper. Ek weet van ‘n boer wat sy vuurwapens moed ingee vir vernietiging want die SAPD wou nie lisensies uitreik daarvoor nie. Hy het die bewyse dit is ingehandig. Hy het dit twee weke later by ‘n onwettige wapen handelaar lans die pad teruggekoop… Lees meer »

Hanna Hoekom

SAPS is mos nou ten volle transformeer, dan nie? Het enige iemand iets beter (of selfs bruikbaar) verwag? I rest my case.

George in Bloem

‘n Klient van my is ‘n hele ruk gelede aangeval en daar is gepoog om hom en sy maatskappy te beroof. Daar is ook op hom geskiet. Hy en van sy werkers het teruggeveg en die drie aanvallers se pistool afgeneem en hom en sy twee maats flenters gefoeter. Dit het na die tyd uitgekom,en die saak gaan nog steeds aan,dat die voertuig en die wapen gebruik in die roof by ‘n tjommie in die SAP geleen is. Die perd wat die leen werk gedoen het is nou nog nie ge-arresteer nie en in teendeel hy werk steeds by die… Lees meer »