Koswinkelgroepe ondersoek oor knoffel, gemmer se pryse

Knoffel (Foto: Pixabay)

Die Nasionale Verbruikerskommissie (NVK) gaan van die land se grootste koskleinhandelaars ondersoek rakende bewerings dat hulle buitensporige pryse vir knoffel en gemmer vra.

“Die ondersoek volg op verontwaardiging onder verbruikers en klagtes op sosiale media rakende die beweerde buitensporige pryse van dié produkte deur verskillende verskaffers,” het Thezi Mabuza, waarnemende kommissaris van die NVK, gesê.

Food Lovers Market, Spar Group, Pick n Pay, Shoprite, Boxer, Cambridge Foods en Woolworths word reeds in dié verband ondersoek.

Volgens Mabuza sal die NVK se ondersoek egter nie net tot die sewe koskleinhandelaars beperk wees nie. “Ons doen ʼn beroep op verbruikers om ʼn klag by die kommissie in te dien indien hulle vermoed dat ʼn handelaar buitensporige prysstygings toepas.”

Buitensporige prysstygings word deur die wet omskryf as onbillike of onredelike prysverhogings wat nie ooreenstem met of nie gelykstaande is aan die styging in die koste om die goedere of diens te lewer nie.

Knoffel en gemmer is volgens Mabuza op die lys van 22 noodsaaklike produkte ingevolge die nasionale ramptoestand waarvoor daar nie onbillike of onredelike pryse gehef mag word nie.

ʼn Boete van tot R1 miljoen of 10% van ʼn handelaar se jaarlikse omset kan vir buitensporige prysstygings opgelê word. Dit kan ook tot tronkstraf van ʼn maksimum van 12 maande lei.

Verbruikers kan die NVK tydens kantoorure by 0800 014 880 of 012 428 7000 bel om ʼn klag in te dien.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Anoniem

Die prys van baie kruideniersware het só die hoogte ingeskiet dat my maandelikse inkopies omtrent in my handsak kan pas.

Thelsa

Dit is nie altyd die koswinkels wat die pryse ‘laai’ nie, die leweransiers is verantwoordelik vir die bepaling van die aankoopprys. Dis waar die pryse opgejaag word.

Robert

Ek dink hulle gaan vind dat dit oor aanbod en aangraag gaan, tans is daar ‘n tekort aan gemmer en knoffel, almal soek dit as ‘n natuurlike hulp vir die imuunstelsel.

Hennie J

Dankie Thelsa, jy slaan die spyker op die kop. As die leweransier se pryse die hoogte inskiet verwag die NVK die kleinhandelaar moet dit subsideer? In elk geval hierdie NVK soos meeste van die sogenaamde waghonde is net nog n plek waarheen kaders ontplooi is teen vet salarisse en waar die krip naby staan.

Ferryman

Die pryse van knoffel en gemmer het die hoogte ingeskiet omdat die aanvraag hoer is as die aanbod. Dieselfde het laasjaar gebeur met pynappels toe almal pynappelbier gemaak het.
Knoffel, gemmer en suurlemoene asook ander sitrus kan ook nou baie in aanvraag wees agv eie pogings om boereraad te volg om weerstand op te bou teen Covid. Die boere was nie voorbereid op ‘n toeloop nie, en die wat geplant het lag nou heelpad bank toe.
Dit is maar ‘n gevolg van Covid.