Erge verkeersopeenhoping Vrydagmiddag in Johannesburg. (Foto: Verskaf)
ʼn Reuse‑kragonderbreking in talle buurte in die sentrale en noordelike dele van Johannesburg het Vrydagmiddag erge verkeersopeenhopings veroorsaak.
Volgens City Power het die kragonderbreking talle woonbuurte in Johannesburg geraak, insluitend Sandton, Midrand, Illovo, Alexandra, Rosebank, Hyde Park, Parkview, Westcliff, Northcliff en Linden. Minstens 20 substasies is deur die onderbreking geraak en elke substasie voorsien krag aan minstens tien woonbuurte.
Eskom het bevestig die kragonderbreking is veroorsaak deur ʼn onderbreking by ʼn transmissie-substasie. Die kragvoorsiener het beklemtoon die onderbreking het nie met beurtkrag verband gehou nie.
Tegnici is dadelik na die perseel gestuur om die probleem op te spoor en teen 15:50 het City Power bevestig dat die kragtoevoer herstel is.
Die kragonderbreking was egter lank genoeg om erge verkeersopeenhopings te veroorsaak en motoriste wat op pad was huis toe vir die naweek se bloeddruk op te jaag. Sosialemediagebruikers het foto’s gedeel van lang rye voertuie wat by aansluitings en snelwegafritte staan aangesien verkeersligte ook buite werking was.
Intussen hou kraggebruikers asem op om te sien of beurtkrag dié naweek toegepas sal word. Dit kom nadat Eskom elke dag die week gewaarsku het dat die nasionale kragnetwerk onder druk verkeer en dat beurtkrag waarskynlik is. Die kragreus kon egter daarin slaag om heelweek die ligte aan te hou en beurtkrag is nie die week toegepas nie.
-
- Erge verkeersopeenhoping Vrydagmiddag in Johannesburg. (Foto: Twitter via @Gerald_DH)
-
- Erge verkeersopeenhoping Vrydagmiddag in Johannesburg. (Foto: Twitter via @floyd_mnisi)
Kan ons nie maar afsien van die woord kragreus nie en dit nou kraggeraamte of so iets noem nie.
Die enigste reuse in eskom is ‘n berg skuld, reuse prestasie bonusse, reuse salarisse, reuse onbevoegdheid, dit in ag geneem is dit seker ‘n kragreus.
Verskonings Eskom.
Sit julle in die verkeer of is julle al tuis en word julle private krag nie hierdeur geraak nie.
Moet dalk ondersoek word dink ek…
Hoe toevallig kan toevallig wees… met Venezuela ook in die donker… en Eskom in die pound seats… ons moet weet wie is die baas…
Ja nee daar moet “generators”? vir hulle wag anders weet ek nie.
‘n Normale dag in Afrika, ‘n abnormale dag is wanneer niks verkeerd loop.
Sabotasie?
Kragreus? Kragdwerg is méér korrek en nader aan die waarheid.
KragZombie. Reeds dood maar ploeter nog stadig aan vir n tydjie.
Nou verstaan ek hoekom my man sê hy wil nie daar gaan bly nie.
Sterkte aan almal wat in daardie verkeer vas gesit het.
EKSDOM
Wat is ek?
Krag-Dwergie is die naam! Sneeuwitjie kan nou maar op die stoof gaan sit. Eishkom en Eishgaan, maar niks gebeur nie!