Krieketbaas se ouers toegesluit oor maskers

Oudprofessore Corinne en Herman Strydom is in hegtenis geneem omdat hulle sonder maskers gaan stap het. (Foto: Verskaf)

Twee oudprofessore van Potchefstroom in Noordwes is Vrydagmiddag in Durban-Noord in hegtenis geneem omdat hulle sonder hulle maskers gestap het.

Proff. Herman Strydom (71) en sy vrou, Corinne (67), het verlede week by hul seun, Heinrich, baas van die Dolphins-krieketspan, en sy vrou, Gerna, gekuier om hulle kleindogter, Leah, te ontmoet. Leah is drie weke gelede gebore en is die egpaar se eersteling.

Herman vertel aan Maroela Media dat hy en sy vrou Vrydagmiddag ’n entjie in ’n “stil straat” gaan stap het. In gedagte, sê hy, het hulle nie hul maskers aangehad toe polisie hulle op die hoek van Old Mill- en Adelaide Tamboweg voorkeer nie.

“Daar was nie ’n mens in sig nie. Skielik het ’n polisievoertuig langs ons stilgehou en twee vroue het uitgeklim. Hulle het gevra waar ons maskers is.

“Ons het dit dadelik uit ons sakke gehaal en opgesit,” sê Herman.

Hy sê die polisiebeamptes het egter nie in ’n verduideliking of verskoning belanggestel nie.

“Ons is in ’n vol vangwa ingebondel en na die polisiestasie geneem.

“Ek het kalm gebly want het geweet dat dit nie sou help om ons teë te sit nie. Ek was egter baie ontsteld.”

Volgens Herman was die vangwa uiters vuil en daar was geen sosiale afstand nie.

Boonop loop die Strydoms weens hul ouderdom ’n verhoogde risiko sou hulle die koronavirus opdoen.

By die polisiestasie is Herman saam met ander mans in ’n sel geprop terwyl Corinne in ’n kantoor moes sit. Corinne het daarin geslaag om foto’s te neem en haar seun te kontak voordat polisiebeamptes haar selfoon gevat het.

“Jy kan sommer sien daai selle was in 100 jaar nog nie skoongemaak nie,” sê Herman.

Hy vertel dat hulle bykans vier uur, van 14:00 tot ongeveer 17:30, aangehou is. Weens ’n kragonderbreking kon hulle nie die vrylatingsfooi betaal nie en moet hulle later die maand terugkeer Durban toe om in die hof te verskyn.

Die Strydoms saam met hulle seun Heinrich, baas van die Dolphins-krieketspan in Durban-Noord. (Foto: Verskaf)

“Dit was ’n baie slegte ervaring en nou lê dit ook nog voor,” sê Herman.

Die egpaar sê dit gaan egter baie goed met hulle en dat hulle darem al oor die gebeure lag.

“Wat kan ’n mens anders doen as lag?” sê Heinrich.

“Ek is dankbaar dat die nagmerrie-ervaring nie erger uitgedraai het nie en dat my ouers die situasie as ’n avontuur kon beleef – met ’n baie goeie sin vir humor.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

88 Kommentare

jongste oudste gewildste
Robert

As die wet sê jy is verplig dan moet jy maar gehoor gee, ek dink egter die polisie beamptes wou van hulle ‘n voorbeeld maak.

Genis

Rassisties as jy vra…. teiken weerlose ou mense…

Anel

MISDAAD, regte misdaad fier hooggety maar die polisie hou hulle op met onnuttighede!!( Ek sit ook my skerm op slegs as ek ‘n winkel binne gaan.) Dis geen wonder hierdie land is soooo in sy kanon nie.

Swerwer

Belaglik! Die Polisieman kon net stilhou en vir hulle gevra het om asseblief hulle maskers op te sit of om terugtegaan huis toe watn dit teen die reêls om sonder maskers te loop. Der duisende van die landsburgers loop daagliks sonder maskers en hul kom niks oor nie. Daar bestaan so ‘n iets soos menslikheid alhoewel die mede landsburgers nie weet wat dit beteken nie.

Mallie

Jy is nie verplig om n masker te dra nie. Onthou jou mense regte.