‘Kruppel’ man (64) in huis met panga aangeval

Foto: Verskaf.

Piet van Deventer (64), wat Vrydagoggend in sy huis oorval en met ʼn panga aangerand is, is steeds in die hoësorgeenheid van die Netcare Unie-hospitaal in Alberton.

Volgens Pieter van Deventer is sy pa tussen 08:00 en 09:00 in sy huis in Heidelberg oorval. “Net my pa en die huishulp was tuis, my ma was by die werk. Die aanvaller(s) moes oor die muur oor die lemmetjiesdraad geklim het,” het Van Deventer gesê.

Piet was in die eetkamer toe die aanvallers ingestorm en hom met die panga begin aanval het. “Hulle het hom op die kop en lyf geslaan. Hy het erge wonde aan sy kop; sy skedel is op drie plekke gebreek; sy kakebeen is gebreek én sy arm is heeltemal gebreek met ʼn groot vleiswond daaraan,” het Van Deventer vertel.

Volgens hom kan ʼn mens uit die aard van sy pa se beserings sien hy het terugbaklei. Die huishulp was besig om wasgoed op te hang ten tyde van die voorval. “Sy het op hulle afgekom en toe het hulle gevlug. Hulle het niks gesteel nie.”

Die huishulp het volgens Van Deventer begin skree en die bure het aangehardloop gekom en hom gebel.

Piet is per mediese helikopter na die hospitaal gehaas. Piet het volgens Van Deventer van ʼn rolstoel gebruik gemaak as hy ver ente moes beweeg. “My pa was heeltemal kruppel weens ʼn virus wat hy vroeër opgedoen het. Jy kon hom net van die stoel af stamp en hy sou nie veel kon doen nie.”

Van Deventer vertel sy pa is steeds aan ʼn asemhalingsmasjien gekoppel. Dokters sal glo Woensdag weer sy toestand assesseer. Die gesin weet ook nog nie of daar enige breinskade sal wees nie.

“Dis nie mense wat hierdie goed doen nie,” het Van Deventer in reaksie op die aanval op sy pa gesê. Hy vertel die gesin weet self nog nie presies wat gebeur het nie omdat sy pa nog nie wakker is en vir hulle kan vertel nie.

Kapt. Thivhulawi Tshilate, woordvoerder van die polisie, het die voorval aan Maroela Media bevestig en gesê die saak word ondersoek.