KSA reageer op gerugte oor inmenging

Vernon Philander en van sy spanmaats Foto: ICC Cricket World Cup 2015

Vernon Philander en van sy spanmaats Foto: ICC Cricket World Cup 2015

Krieket Suid-Afrika het uiteindelik reageer op bewerings van politieke inmenging toe Vernon Philander vir die halfeindstryd van die Wêreldbeker teen Nieu-Seeland gekies is.

Die raad van die KSA het ʼn verklaring uitgereik ná Haroon Lorgat, uitvoerende hoof, gesê het die raad van direkteure stel ondersoek in oor die spankeuse vir die wedstryd teen Nieu-Seeland. Dié hersiening kom nadat Mike Horn, die motiveringspreker wat die Proteas tydens die Wêreldbeker ondersteun het, Donderdag bevestig het dat daar wel politieke inmenging was. Horn het egter Saterdag gesê sy uitlatings is buite konteks aangehaal.

Die ondersoek het Vrydag plaasgevind toe die paneel met Lorgat, Russell Domingo, die Protea-afrigter, en Andrew Hudson, nasionale hoofkeurder, vergader het.

Uit die ondersoek is bevind dat:

– die spankeuse en -aankondiging het die gewone en gevestigde praktyk en prosedures van die keuringspaneel gevolg. Dit sluit ʼn gesprek met die uitvoerende hoof in oor kwessies van transformasie;
– die mediese span het Philander fiks genoeg en beskikbaar verklaar om gekies toe word. Die afrigter het ook direk met Philander gesels om sy gereedheid om te speel, te bevestig;
– Hudson, Domingo en Lorgat het bevestig dat hulle, individueel of gesamentlik, geen opdrag of inmenging van enigiemand ontvang het nie, veral nie van die minister van sport of lede van die KSA-raad nie;
– Hudson en Domingo het namens die keuringspaneel bevestig dat hulle almal bewus is van en die protokol en riglyne volg soos dit deur die raad in 2013 herbevestig is. Dit sluit transformasieriglyne in waarvolgens die paneel, op meriete, minstens vier spelers van kleur moet oorweeg vir spankeuse;
– Die sameroeper en afrigter het met Lorgat vergader wat dit benadruk het dat hulle die beste spelers moet oorweeg terwyl die transformasieriglyne in ag geneem word;
– Hudson en Domingo het bevestig dat daar, soos gewoonlik, ʼn hewige debat was oor die keuring van die span en hulle het die finale span afgeteken met hul volle ondersteuning en vertroue;
– Die sameroeper, afrigter en keuringspaneel het hul tevredenheid met die spankeuse uitgespreek met spesifieke verwysing na die feit dat Philander ʼn gereelde en eerstekeuse-speler was, veral vir toestande in Nieu-Seeland;
– Hudson en Domingo het hul begrip van die riglyne verduidelik en bevestig dat daar talle geleenthede was waar meer as vier spelers van kleur gekies is. Tydens die seldsame geleenthede wat slegs drie spelers gekies is, was dit weens buitengewone omstandighede soos beserings. Die bepalende kriteria was telkens volgens meriete;
– Domingo het bevestig dat hy nooit ʼn SMS van Lorgat ontvang het soos beweer is nie, en Lorgat het ook bevestig dat hy nooit ʼn SMS aan Domingo gestuur het nie.

“Gebaseer op hierdie inligting, en Mike Horn se verduideliking, is dit duidelik dat die bewerings in die media vals en ongegrond is,” het Chris Nenzani, president van KSA, gesê. “Die raad is tevrede met die bevindings van die hersieningspaneel en die prestasie van die keuringspaneel, die afrigter en die uitvoerende hoof. Ons bedank al die partye vir hul eerlikheid en bereidwilligheid om aan hierdie proses deel te neem.”

Nenzani het gesê die raad wil van die geleentheid gebruik maak om die Proteas geluk te wens met hul Wêreldbeker-veldtog en besef dat die span hul beste gelewer het, maar op die dag uitgeklop is deur ʼn span wat net so goed is. “Die raad besef dat hierdie ʼn emosionele saak is, en dat dit nie maklik is om dit te demp nie. Die raad hoop egter dat die saak nou afgehandel is.” Hy het gesê die raad en KSA sal nie verder hieroor kommentaar lewer nie.

Bron: Sport24, News24

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Herman

Glo hulle amper…

scalla

Benoude katte maak benoude spronge.

johannes van rooyen

Nie 1 van die mense sal hul salaris op die spel plaas vir die waarheid nie in die nuwe SA is daar mos ñ groot probleem met die waarheid ! Bewys my verkeerd asb !!!

Stephan

Ja, ek ons moet julle glo…Bla, bla, bla…
Dit klink soos ‘n kliënt wat net die relevante antwoorde gee in opdrag van sy prokureur.
Dis ‘n jammerlike dag wanneer mens jou respek vir toplui begin verloor, dat sport (weereens!) seerkry.
“Skoenmaker, hou jou by jou lees” (maw. Politici, hou julle neuse uit sport!

CJAN

Die Proteas sal NIE en KAN nie ‘n wereldbeker wen NIE!!! Tensy spelers opvorm gekies word en die politiek uit krieket verban word, sowel as uit rugby. Die wereldbekerrugby gaan dieselfde pad loop hierdie jaar. Die bokke gaan in hulle semis geklop word. Ek hoop ek is verkeerd. As politiek verder in enige sport toegelaat gaan word, gaan en sal Suid Afrika nooit ooit weer ‘n faktor wees in Wereldsport nie. Al sportsoort waarin SA nog gaan uitblink is, as dit ‘n individueel sportsoorte is, soos swem, golf byvoorbeeld. Al wat hierdie twak op ‘n end kan bring is as… Lees meer »