Kyk: Duikers liries oor jaarlikse sardientjieloop

Sardientjies in ‘n net op die strand in Illovo, KwaZulu-Natal. (Foto: Facebook/Sardine Run 2021)

Die Indiese Oseaan aan die KwaZulu-Natalse kus is tans vol dolfyne wat in en uit die water spring, haaie wat verrys uit die dieptes en voëls wat uit die lug in die water duik – alles om hulle volgende maaltyd te jag: sardientjies.

Dié kusgebied van Suid-Afrika is die tuiste van ʼn jaarlikse skouspelagtige migrasie van miljoene sardientjies.

Die sardientjieloop duur ʼn paar maande en bereik gewoonlik sy piek in Julie en lok ʼn verskeidenheid van mariene-roofdiere.

“Dit is ʼn super-pod van gewone dolfyne,” het Michelle Carpenter, ʼn marienebioloog, opgewonde aan APF gesê.

Volgens Gary Snodgrass, ʼn professionele duiker, soek die sardientjies na diepte vir beskerming. “Dit is waar die haaie inkom,” sê hy.

“Jy het die haaie onder in die water en die dolfyne aan die buitewyke; hulle keer basies die sardientjies om te ontsnap.”

Die rede vir die jaarlikse sardientjieloop is nie werklik bekend nie, maar wetenskaplikes glo dit word verbind aan die visse se voortplantingsiklus.

Diegene wat die feesmaal onder die water beleef het, het liries op dié ervaring reageer.

“Ongelooflik,” het Laurent, ʼn Franse duiker wat nie sy van verskaf het nie, aan AFP gesê. “’n Haai! Kersie op die koek. Ongelooflik. Die haai het ons nie gebyt nie. Dit was die beste tyd nóg.”