Kyk: Ondersoek ná aanranding terwyl polisie glo toekyk

In die video is dit duidelik hoe Byliefeldt deur die mans oorval en aangerand word (Foto: Skermskoot)

Die polisie het ʼn ondersoek van stapel gestuur nadat ʼn video aan die lig gekom het wat wys hoe ʼn groep mans ʼn ander man in ʼn polisiestasie op die grond rondsleep en skop. Dit terwyl die polisie skynbaar toekyk en niks doen om die aanval te keer nie.

Die voorval het Sondag omstreeks 11:30 by die Witrivier-polisiestasie in Mpumalanga plaasgevind.

In die video is dit duidelik hoe ʼn man aggressief deur ʼn groep ander mans geruk en pluk word, terwyl ʼn vrou histeries skreeu: “Help hom. Doen iets.” In die video kan gesien word hoe die polisiebeamptes staan en kyk terwyl die groep mans die slagoffer op die grond rondsleep en teen die kop skop.

Delia Jordaan, wat die video geneem en op sosiale media geplaas het, sê die polisie het net staan en toekyk terwyl haar verloofde, Barend Byliefeldt, deur vier mans oorval en aangerand is. Die mans was agter haar verloofde se selfoon aan.

Jordaan en Byliefeldt het na die polisiestasie gevlug ná ʼn konfrontasie met die groep mans op die R40 digby die Witrivier-gholflandgoed. Die beweerde aanranders was glo vies dat die paartjie die onderonsie met hul selfone opgeneem het.

“Ons het gevoel ons lewens is in gevaar, en dit in ʼn plek waar jy veronderstel is om veilig te voel,” vertel Jordaan oor die episode in die polisiestasie.

Só het die konfrontasie verloop

Jordaan vertel die paar het Sondag van hul plaas na Witrivier gery om kruideniersware te gaan koop. Hulle hond was saam met hulle in die motor.

“Op die R40-pad, digby die Witrivier-gholflandgoed, het verskeie voertuie oor dubbele soliede sperstrepe ons verbygesteek. Hulle het nie ag geslaan op enige aankomende verkeer nie en het ons in die proses byna van die pad afgedruk.”

“My verloofde het vir my gesê om sy foon te vat en die voorval af te neem, aangesien hulle baie gevaarlik en roekeloos gery het.”

Jordaan vertel by die Casterbridge-sirkel in Witrivier is hulle deur die einste verdagte voertuie omring. Die een voertuig, ’n swart Range Rover sonder ’n nommerplaat, het skielik voor die paar tot stilstand gekom en die pad versper.

“Die bestuurder van dié voertuig het uitgeklim, sy vuurwapen uitgeruk en na die bestuurskant van ons motor geloop. My verloofde het sy venster toegedraai om ’n konfrontasie te verhoed.”

Volgens Jordaan het daar intussen ʼn ander voertuig agter hulle stilgehou. Dié bestuurder het ook uitgeklim. Hy het ʼn groot voorwerp in sy hand gehad. Hy het die paar se motor genader en een van die motor se vensters met die voorwerp stukkend geslaan.

“My verloofde het besef ons is in gevaar en hy het besluit om die motor in trurat te sit en weg te jaag.”

Die paartjie kon daarin slaag om ongedeerd weg te kom en het na die plaaslike polisiestasie gejaag. Die mans het hulle agternagesit en hulle steeds van die pad af probeer druk.

“Een van die motors het ‘n taktiese reaksie-eenheid se logo opgehad.”

Polisie weier glo om te help

In die video kan ‘n mens sien hoe die polisie staan en kyk terwyl Byliefeldt aangerand word (Foto: Skermskoot)

By die polisiestasie het die paar uit hul motor gespring en die gebou ingehardloop. “Ek het geskree dat die polisie ons moet help, want ons word deur gewapende mans agtervolg.”

In die polisiestasie het die beamptes die paar na ʼn kamer geneem. “Ons kon vanuit die kamer se venster ons motor sien. Ons het ook gesien hoe die groep mans wat ons agtervolg het buitekant saamgedrom het. Van die mans het om ons motor gestaan en sommige het die polisiestasie binnegekom. Hulle het vir polisiebeamptes gesê dat hulle ons selfone wil hê.

“Ons het in daardie stadium vreesbevange gevoel. My verloofde het als met sy selfoon afgeneem. Die polisie en die groep mans het nie daarvan gehou nie. Die adjudant-offisier het ons gevra om ons selfone te oorhandig, maar ons het geweier.”

Dit word beweer dat een van die mans gedetailleerde inligting oor die paartjie gehad het, insluitend waar hulle woon.

“Ons het in gevaar gevoel en het ons vriende, prokureurs en plaaslike veiligheidsmaatskappye probeer kontak om ons te kom help. Barend het een van sy vriende gebel om stasie toe te kom om seker te maak ons hond is ongedeerd. Die hond het nog heeltyd in die motor gesit.”

Jordaan vertel Byliefeldt het buitekant toe gegaan om sy vriend te help om die hond veilig uit die motor te kry. Toe hy buitekant kom, het hy gesien hoe die groep mans die vriend ook intimideer en probeer keer om by die hond uit te kom.

“Barend het die hele voorval afgeneem. Die groep mans het dit gesien en wou probeer keer. Hy het in die stasie ingehardloop en hulle het hom agterna gesit. Dit is toe dat die vier mans in die stasie hom oorval en begin aanrand.”

Die mans kon daarin slaag om tydens die struweling Byliefeldt se foon in die hande te kry en te vernietig.”

Jordaan sê die polisie het die groep mans boonop ná die voorval bloot laat gaan.

“Toe ons by die polisiekantoor aankom, het ons verskeie kere gevra om ’n verklaring af te lê en ’n saak te open. Ons is deur die polisie geïgnoreer.”

Reaksie op die voorval

Brig. Leonard Hlathi, woordvoerder van die polisie, sê die polisie betreur die voorval.

“Volgens die SAPD-bestuur is ʼn polisiekantoor nie ʼn gevegsterrein nie, en kan sulke wettelose gedrag nie geduld word nie. Die optrede van die individue wat in die fisieke onderonsie betrokke was, is onaanvaarbaar,” sê Hlathi.

Die polisie versoek Byliefeldt om ʼn strafregtelike klag aanhangig te maak sodat die saak ondersoek kan word.

’n Ondersoekspan is ook saamgestel om die gedrag van die polisielede wat daardie dag aan diens was, te ondersoek.

Intussen is ’n strafregtelike klag van kwaadwillige saakbeskadiging en crimen injuria teen Byliefeldt aanhangig gemaak. Hy word daarvan beskuldig dat hy teen ʼn sekere voertuig gebots het en na bewering rasse-uitlatings gemaak het.

“Die Onafhanklike Polisie-ondersoekdirektoraat (Opod) is bewus van hierdie voorval,” sê Hlathi.

Die DA en VF Plus het Opod versoek om dringend ondersoek in te stel ná die video soos ʼn veldbrand op sosiale media versprei het. Die DA het ook aan genl. Khehla Sitole, nasionale polisiekommissaris, geskryf en gevra dat hierdie groep mans so gou as moontlik geïdentifiseer en in hegtenis geneem word.

“Daar moet ook vasgestel word of hierdie mans enige verbintenisse met die polisie het. Die nasionale polisiekommissaris moet ook ’n interne ondersoek instel na die gebrek aan optrede deur SAPD-lede en dat hulle glo geweier het om ’n saak te open. Die gebrekkige veiligheid by die polisiekantoor moet ook ondersoek word,” sê Andrew Whitfield, die DA se woordvoerder oor polisie.

My fiance being assualted inside White River SAPS (Police Station) by members of the public by multiple members of SAPS do nothing.

Posted by Delia Human on Sunday, March 28, 2021

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

79 Kommentare

jongste oudste gewildste
Misky

Dit is skokkend!!!! Dagvaar die rook uit hulle en vat die saak verder. MM, hou ons asb op hoogte

Sarel

Dit was heel moontlik due Polisid self en hulle szl bexkerm word. OPOD se werkslading is van so aard dat dit jare kan neem.

Sandra

Die voorval is absoluut skokkend. Dat so iets in ‘n plek waar mens veilig moet voel kan plaasvind is ‘n transgressie van die man se regte. Die polisie moet aangekla word wat dit toegelaat het in die eerste plek. Maak nie saak wat die man gedoen het nie, geen persoon moet so aangeval word onder enige omstandighede nie. Die feit dat hulle sy persoon deursoek het terwyl die polisie toegekyk het is teen enige reels wat daar nog moontlik is. Ek wil my verstout om te se dat as dit andersom was, sou die wit man definitief nou in die… Lees meer »

Veronica

o genade en dis ons voorland!!!!! ek hoop nie julle gaan die saak net hier los nie, liewe land is ons nerens meer veilig nie????????????????

Tipper

Sit dit op you tube dan kan ons beter gesels.