Verskeie diere is die afgelope paar dae deur die DBV gered. (Foto: Cape of Good Hope SPCA/Facebook)
Talle troeteldiere, plaasdiere en wilde diere is die afgelope naweek noodgedwonge aan die genade oorgelaat toe inwoners van die Wes-Kaap weens swaar reën en oorstromings moes vlug.
Inspekteurs van die Kaap de Goeie Hoop-dierebeskermingsvereniging (DBV) het egter ingegryp en talle diere van ʼn amper seker waterdood gered.
Die DBV sê dit is algemeen dat families hul diere ongelukkig moet agterlaat wanneer hulle uit hul huise vlug. Die diere wat agterbly, het gewoonlik nie veel van ʼn kans op oorlewing nie en met die ysige temperature die afgelope paar dae sou talle diere dit waarskynlik nie oorleef het nie.
“Ons dapper inspekteurs het dae lank deur die ysige waters gewaad op soek na gestrande troeteldiere en allerlei ander diere,” sê die DBV.
Inspekteurs het talle honde, katte, perde, beeste, ʼn klompie hoenders – en een verkleurmannetjie – in die provinsie gered.
Wetstoepassers en noodreddingsdienste van die Kaapstad-metro het ook hand bygesit en verskeie perde na hoër grond gelei.
(Foto: Cape of Good Hope SPCA/Facebook)
-
- (Foto: Cape of Good Hope SPCA/Facebook)
-
- (Foto: Cape of Good Hope SPCA/Facebook)
In ʼn video wat die DBV gedeel het, kan gehoor word hoe ʼn kat om hulp skree, terwyl ʼn perd in die yskoue water bibber en ʼn hond amper verleë na sy redders staar.
“Ons is weer vandag daar buite en gereed om meer dierelewens te red. Diere het ons nou meer nodig as ooit,” sê die DBV.
Terwyl die Nasionale Seereddingsinstituut (NSRI) Maandag besig was om 46 inwoners van Stanford naby Hermanus na veiligheid te help nadat die Kleinrivier sy walle oorstroom het, het hulle ook ʼn papegaai en verskeie ander troeteldiere uit huise en geboue gered.
Nog 71 mense, onder wie bejaardes, kinders en twee swanger vroue, is ook Maandagmiddag uit Strandfontein – saam met hul troeteldiere – na veiligheid gebring. Baie van dié mense en diere word nou by gemeenskapsentrums gehuisves.
Baie dankie vir julle onbaatsugtige werk. :)
Daar is ‘n spesiale plekkie in die hemel vir mense wat hulle oor diere ontferm. Dankie.
Jy is so reg. My dogter sê eendag iets wat by my sal bly vir altyd. God het soveel sorg ingesit om diere te maak – hulle het elkeen hulle eie persoonlikheid en hulle eie maniertjies. As hulle nie belangrik was nie sou Hy nie soveel aandag aan hulle gegee het nie. So ja, ek glo ook daar is n spesiale plek vir sulke mense in die hemel. Jammer almal sien dit nie so nie!
Baei baie DANKIE dat julle diere lewens gered het wat nie hulle self kon help nie!!!!
Baie dankie DBV en NSRI!!!