ʼn Man is in hegtenis geneem in verband met moord op Cindy Bailey (40), ʼn ma van KwaMashu in Durban, KwaZulu-Natal.
Bailey is vroeër dood aangetref onder ʼn boom langs haar huis in J Section in KwaMashu. Sy is na bewering verwurg en haar rok is in haar mond gedruk.
“Beamptes het Vrydag onverpoosd gewerk om die saak op te los en ʼn 19-jarige verdagte is in hegtenis geneem,” het kol. Thembeka Mbhele, woordvoerder van die polisie, gesê.
Die man sal binnekort in die Ntuzuma-landdroshof verskyn op aanklag van moord.
Mbhele het gesê ʼn nadoodse ondersoek sal die oorsaak van Bailey se dood bepaal en ook of sy verkrag is.