Laerskoolseun deur leeu aangeval

Jayden Swanepoel in die hospitaal. Foto: Facebook

Jayden Swanepoel in die hospitaal. Foto: Facebook

ʼn Negejarige seun van Springs aan die Oos-Rand moes Dinsdagmiddag geopereer word nadat hy by ʼn lodge en leeupark buite Tzaneen in Limpopo deur ʼn leeu aangeval en gebyt is.

Jayden Swanepoel (9) was saam met sy ouers en ander familielede by die Letaba River Lodge toe die voorval gebeur het. Joost Swanepoel, Jayden se oom, het Woensdag aan Maroela Media gesê hulle was binne ʼn leeukamp waar besoekers interaksie met die leeus kan hê.

“Ons het die leeus gevryf en daar was ʼn gids saam met ons in die kamp wat vir ons leeus die gewys het. In ʼn stadium het Jayden se ma, Sonja, ʼn foto van my en my vrou geneem en in hierdie oomblik het Jayden sy rug op die leeus gedraai en na sy pa toe gestap. Een van die leeus het gehardloop en van agter op Jayden gespring, hom gebyt en begin sleep,” het Joost gesê.

Hy vertel dat hy dadelik op die leeu geduik het om hom van Jayden af te kry, terwyl Sonja vir Jayden opgetel en met hom uit die kamp gehardloop het. Jayden het ʼn oop wond aan sy keel gehad waar die leeu hom gebyt het en was ook stukkend agter sy oor en op sy rug waar die leeu sy naels ingeslaan het.

Joost, ʼn paramedikus, het dadelik na Jayden se wonde gekyk en bevestig dat hulle met hom na ʼn hospitaal moes jaag. “Marius, die bestuurder by die lodge, het dadelik vir Jayden met sy bakkie na die Mediclinic Tzaneen gehaas waar hy die middag geopereer is om die skade te herstel. Die byt was ernstig, want van die spiere is heeltemal afgeskeur, maar dit kon baie erger gewees het. Gelukkig is daar geen slagare afgebyt nie,” het Joost verduidelik.

Volgens Joost het Jayden en sy ouers by hom en sy vrou vir die skoolvakansie in Polokwane kom kuier en hy het hulle juis die dag na die leeupark gevat vir ʼn lekker uitstappie. “Dit is sleg wat gebeur het, maar dit bly ʼn ongeluk. Die mense by die lodge was so behulpsaam en het ons ongelooflik goed bygestaan. Hulle het selfs vir ons akkommodasie en ander onkostes in Tzaneen betaal en het die middag heeltyd by ons gebly by die hospitaal. Gisteraand het hulle weer vir Jayden gaan kuier. Hulle het regtig uit hul pad gegaan om ons te help,” het hy gesê.

Jayden is Woensdagoggend ontslaan en dit gaan tans baie goed met hom. “Sy nek is maar nog seer en hy is bietjie naar wat maar net ʼn newe-effek van die narkose is, maar dit gaan goed met hom.”

Hy het gesê die familie het Jayden Woensdagoggend weer na die leeupark toe gevat om hom kans te gee om die voorval te verwerk. “Ons was nie weer in die kamp in nie, maar het van buite na die leeus gekyk en hy was heel oukei. Hy hanteer die voorval baie goed,” het Joost gesê.

Maroela Media het Marius by Letaba River Lodge gekontak, maar hy wou geen kommentaar lewer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

41 Kommentare

jongste oudste gewildste
Velle

Leeus is wilde diere en moet nooit onderskat word nie. Die ouers moes die risiko’s besef het ongeag of die leeus as mak beskou word. Die besering kon noodlottige gevolge gehad het.

Andre Bence

Dit was absoluut onverandwoordlik vanaf die veldwagter se kant, want swanger dames en kinders word glad nie toegelaat in enige kamp waar wilde diere gehou word nie. Dit is uiters gevaarlik want hulle word op natuurlike instinkte uitgesonder as maklike prooi. Selfs in leeu kampe waar jy slegs in jou voertuig mag bly kan mens waarneem hoe die leeus die kinders voortdurend dophou.

Fluiter

Stout leeu!!!

M'Lady

My kommentaar is nie geplaas nie. Was ek dalk te direk? Al wat ek wil se is moet asseblief nie hierdie plekkke besoek nie vir ooglopende redes.

J

Leeus val gewoonlik kinders aan al is hulle hoe mak. Dit is die grote van n prooi. Kyk na statistieke hoeveel kinders word aamgeval deur mak leeus. Dit is maar instink. Baie sterkte hoop Jayden word gou gesond.