Landbank nou op rommelstatus ná Moody’s-afgradering

Die kredietgradeerder Moody’s Investors Service het die Landbank se status na rommel afgradeer.

Moody’s sê die negatiewe vooruitsig weerspieël die verminderende vermoë van die Suid-Afrikaanse regering om die Landbank – wat aan die staat behoort – te ondersteun indien nodig.

“Die uitdagende bedryfstoestande, asook die onvermoë om ʼn permanente uitvoerende hoof aan te stel wat ʼn deurlopende oorsigrol oor die Landbank se bedrywighede kan speel en strategiese rigting kan gee, plaas ook druk op sy [die Landbank se] finansiële vertoning, losstaande assessering en beleggersvertroue,” het die agentskap vandeesweek gesê.

Die landbouorganisasie TLU SA sê intussen die afgradering is net die begin van die finansiële uitdagings wat die landboubedryf vanjaar verder gaan knou.

“Dit raak voortdurend moeiliker om ʼn positiewe gesindheid oor die toekoms van landbou in Suid-Afrika te hê. Nie net moet ons boere daagliks sukkel om kop bo water te hou met uitdagings soos plaasveiligheid, onredelike arbeidswette, veesiektes, droogte en beperkte uitvoergeleenthede as gevolg van swak ekonomiese toestande nie, maar nou word hulle nog verder in skuld gedompel deur ʼn afgradering van die Landbank wat vir die meerderheid boere krediet verskaf,” het Louis Meintjes, president van TLU SA, gesê.

land-grond-landbou-onweer-donderweer-weerlig-wolke-deur-eugene-triguba-unsplash

(Foto: Eugene Triguba/Unsplash)

Die Landbank word reeds sedert November verlede jaar dopgehou en Moody’s het toe al gewaarsku dat ʼn afgradering wink. Die bank is ná dié gradering een keep laer op Ba1, oftewel rommelstatus.

“Dit gaan nou duurder vir die Landbank word om sake te doen, want die bank is afhanklik van fondse van elders om krediet aan kliënte te verskaf. As gevolg van die afgradering sal die Landbank nou meer moet betaal vir die fondse wat sal lei tot ʼn verhoging in die rentekoers vir sy kliënte,” het Meintjes gesê.

Hy waarsku ook dat die afgradering bes moontlik net die begin is van die afgradering van verskeie ander staatsinstellings – en eindelik die land self.

“Vir TLU SA is dit ʼn verdere dolk in die hart dat die Landbank – wat in 1905 op die versoek van TLU SA gestig is – weens jarelange onbekwame bestuur en wanbesteding nie in sy mandaat kon slaag nie en waarskynlik verantwoordelik gaan wees vir die ondergang van verskeie boere.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
Ou Bees

Die Landbank het gesneuwel toe hy oorgevat is…..nes die res.

Degrading

Ek is al vir ‘n rukkie gedegradeer…

Wilhelm

Het die staat nog enige bates of is alles wat hulle gekry het in ’94 nou rommel ?

Lou

En wie moet ons bedank vir die rommel status gradering. Die ANC en al sy skelm kaders wat absoluut alles in die land op alle vlakke verwoes.

Johan Venter

Die regering wil mos nie na die graderingsagentskappe luister nie, hulle bly teen die prikkels skop, al beduie Cyril hoe en vertel van hul planne, en al verlaag die reserwebank die rentekoers, so nou begin die graderingsagentskappe die staatsbeheerde instellings afgradeer.