‘Lardies’ rou ná ongeluk leerling eis

Sharlon Aphane (9), ‘n graad 3-leerder aan die Laerskool Elarduspark in Pretoria. (Foto: Facebook)

“Rus sag prinses.”

Só het die Laerskool Elarduspark in Pretoria op sy Facebook-blad geskryf nadat Sharlon Aphane (9), ʼn graad 3-leerder aan die skool, Dinsdag ná ʼn motorongeluk gesterf het.

Aphane en haar ma, Maria, het omstreeks 13:00 huis toe gestap. ʼn Motor het die dogtertjie getref toe die twee die Delmas-pad, by die oorgang met Barnardstraat, oorgesteek het.

Casper Visser, woordvoerder van Volunteer Emergency Medical Response Unit (VEMRU), het gesê die kind was in ʼn bedenklike toestand toe hy op die toneel aangekom het. Nadat sy gestabiliseer is, is daar aanvanklik besluit om haar met ʼn helikopter na ʼn hospitaal te vlieg.

Sharlon se skoolmaats lê vir haar blomme neer.

Sy het kort daarna weer geen tekens van lewe getoon nie, is bygebring en inderhaas met ʼn ambulans na die Steve Biko Akademiese- hospitaal geneem, het Visser gesê.

Sy het ʼn paar uur later gesterf.

Toy Human, hoof van die Laerskool Elarduspark, het gesê Aphane was ʼn geliefde en gewilde kind.

“Ons sal vir ewig haar vriendelike gesiggie onthou en koester,” het die skool op Facebook geskryf.

Haar skoolmaats het Woensdag ook blomme by die skool neergelê ter herinnering aan haar.

Volgens Human doen die skool alles moontlik om Aphane se ma by te staan. Hulle het ook reeds ʼn hulpfonds op die been gebring om Maria Aphane met enige onmiddellike behoeftes te help.

Begrafnisreëlings is nog nie gefinaliseer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Sandra

Sjoe so jammer om te moet lees van die dogtertjie se dood. Daardie pad is uiters gevaarlik en mense jaag om nie by die verkeerslig ‘gevang’ te word nie. Innige simpatie aan haar ouers en maatjies.

KaterinaKat

My innige meegevoel aan Maria Aphane. Bitter bitter hartseer.

m

So baie jammer Maria Aphane. Wat ‘n pragtige dogtertjie.

Griet

So jammer oor die tragiese afsterwe van die kleine Aphane. Mag God haar mamma, familie en maatjies troos.

Annie

Ai liefie .. mamma baie sterkte en jammer dat iemand anders net nie genoeg omgegee het vir jou engel lyfie nie.. ek bid vir jou dat ons Vader Sy arms styf om jou sal hou en jou krag sal gee.