Leerder geopereer ná taxi-ongeluk

Alexis Timmerman. (Foto: Verskaf)

Alexis Timmerman (12) het Woensdag ʼn geslaagde operasie aan haar arm ondergaan nadat sy verlede Vrydag deur ʼn minibustaxi voor die Laerskool Wierdapark in Centurion raakgery is. Die operasie is moontlik gemaak deur talle barmhartige samaritane wat hul harte én beursies oor die afgelope week vir dié laerskoolleerder oopgemaak het.

Alexis is dieselfde dag uit die Cure Care-hospitaal in Erasmuskloof ontslaan en sterk tans by die huis aan waar haar ouma, Marinda Merryweather, haar versorg.

Maroela Media het vroeër berig dat derduisende rande ingesamel is sodat Alexis by ʼn private hospitaal geopereer en behandel kan word. Dít volg nadat sy ʼn erge traumatiese ervaring by die Kalafong-hospitaal in Pretoria, waar sy aanvanklik opgeneem is, moes deurmaak.

Alexis het haar boarm tydens die ongeluk op twee plekke gebreek en ook ʼn besering aan die weefsel in haar knie opgedoen.

Merryweather sê hulle het nie besef hoe seer haar knie werklik gekry het nie, en dat baie bloed vandeesweek gedreineer moes word. Sy loop met behulp van ʼn kruk aangesien haar been in ʼn stut is.

Merryweather sê hulle skerts lekker en verwys na die kruk as Alexis se “derde been”.

Sy sê hoewel dit baie goed gaan met haar kleindogter, besef sy dat sy steeds deur die voorval getraumatiseer is.

Alexis Timmerman ná die operasie. (Foto: Verskaf)

“Sy droom van die ongeluk en skrik dan uit haar slaap wakker. Sy sal waarskynlik volgende week met berading begin. Sy het ook maar nog pyn en moet haar arm en been oefen sodat dit nie styf raak nie.”

Alexis sien Maandag weer haar dokter en sal ook met fisioterapie aan haar been en arm begin.

“Ons weet daar lê nog ʼn lang herstelpad voor, maar glo dat dit van hier af net beter sal gaan.”

Harte van dankbaarheid

Merryweather sê hulle sal nooit genoeg kan dankie sê aan die mense wat Alexis gehelp het en steeds bystaan nie.

Benewens die duisende rande wat vir haar mediese onkoste en behandeling ingesamel is, het haar dokter die operasie gratis behartig. Hy verkies egter om anoniem te bly.

“Ek was stomgeslaan deur almal se bereidwilligheid om geld te skenk of op ander maniere te help.   Ek het nie woorde om te beskryf hoe dankbaar ons is nie.”

Volgens Merryweather is Alexis net so oorstelp en sê dat sy nie besef het hoe baie mense haar liefhet nie.

“Al die eer kom God toe wat sy engele oor ons pad gestuur het.

“ʼn Mens besef nie hoeveel mense vir mekaar omgee en hoe hulle bymekaar kan staan tot jy in só ʼn situasie beland nie. Dit laat jou ook opnuut besef dat God altyd ʼn plan het – dat jy nooit hoef te vrees nie, want God is altyd daar en sal jou nie in die steek laat nie.”