Leerder sterf tragies tydens raakrugby

Hoërskool Waveren in Tulbagh, Wes-Kaap, is geruk ná die dood van ’n gr. 11-leerder wat Dinsdag tydens ’n raakrugby-wedstryd inmekaargesak het.

Jayden Lee Daniels (19) en sy vriende het tydens pouse raakrugby gespeel toe die voorval plaasgevind het.

Volgens sers. Wesley Twigg, polisiewoordvoerder, is die omstandighede van Daniels se dood in hierdie stadium nog nie bekend nie en ’n geregtelike doodsondersoek is geopen.

“’n Nadoodse ondersoek sal die oorsaak van Daniels se dood bevestig,” het Twigg gesê.

Hoërskool Waveren het op Facebook hulde aan Daniels gebring.

“Ons sal jou altyd onthou as ’n vriendelike, respekvolle en ’n baie netjies jong seun. Iemand met ’n voorliefde vir sport. ’n Rolmodel vir jou medemaats en vele ander,” het die skool geskryf.

Boodskappe van skok en medelye het van Dinsdag af vir Daniels op sosiale media ingestroom.

“Hoërskool Waveren was nooit so geruk met so u tragedie nie. Ek glo nie dat hierdie pyn ooit sal weggaan nie, maar God sal op sy tyd genesing laat geskied. Jayden-Lee Daniëls, jy sal tot in ewigheid in ons hartjies bly,” skryf Elzenay Shadé Schippers.

“God kom pluk altyd sy mooiste blommetjie. Ons as jongelinge voel eintlik die seerste, om iemand te verloor wat in baie mense se harte kom inkruip het, met daai mooi glimlag van hom,” skryf Lee Eurlin Paulse.

Franita Daniels skryf hoe Daniels haar nog Dinsdagoggend met ʼn glimlag gegroet het en toe nie lank daarna heengegaan het nie.

Bronagh Hammond, woordvoerder van die Wes-Kaapse departement van onderwys, het namens die departement medelye aan Daniels se familie, vriende en skoolgemeenskap betuig.

“Beradingsdienste sal aan personeel en leerders beskikbaar gestel word,” het Hammond bevestig.

’n Gedenkdiens vir Daniels is Woensdag by die skool gehou.