Legendariese Bokkaptein oorlede

Die voormalige Springbok-rugbykaptein en oudminister dr. Dawie de Villiers is Saterdagaand in die ouderdom van 81 oorlede.

De Villiers het tussen 1962 en 1970 vir die Springbokke uitgedraf. Hy was tussen 1965 en 1970 die span se kaptein.

Volgens die Waterhole Rugby Museum het De Villiers as student vir die Universiteit Stellenbosch se rugbyspan gespeel voordat hy vir die rugbyspanne van die Westelike Provinsie, Suidelike Universiteite en die Springbokke gekies is. Hy het ook vir die Boland- en Transvaalse spanne uitgedraf.

De Villiers het ná sy rugbyloopbaan die politiek betree en het die Nasionale Party in die parlement verteenwoordig.