Lekota se politieke atoombom teen Ramaphosa

Mosiuoa Lekota, leier van die Congress of the People (Skermskoot uit ‘n regstreekse uitsending)

Die leier van Cope, Mosiuoa Lekota, het vanmiddag ‘n politieke atoombom op pres. Cyril Ramaphosa losgelaat toe hy beweer het Ramaphosa het sy kamerade in die bevrydingstryd aan die destydse veiligheidspolisie verraai sodat hy vrygelaat kon word.

Die Nasionale Vergadering was vanmiddag in beroering soos lanklaas, en die EFF het Lekota al hul debatstyd aangebied om voort te gaan om Ramaphosa se aansien potensieel die hardste klap te gee wat ‘n dienende president in Suid-Afrika al ooit in die parlement gekry het.

Alle oë sal Donderdagmiddag om twee-uur op Ramaphosa wees om te sien hoe hy hierdie regstreekse aanslag op sy integriteit beantwoord.

Volgens Lekota is hy en Ramaphosa op dieselfde tyd in die vroeë 1970’s, as navolgers van die Swart Bewussynsleier Steve Biko, deur die veiligheidspolisie aangehou. Lekota beweer tydens die aanhouding het Ramaphosa aan die veiligheidspolisie se druk toegegee en aan die veiligheidspolisie gesê dat Lekota-hulle sy kop vol kommunistiese idees gestop het – wat destyds teen die wet sou wees.

“So het jy verseker ons word op Robbeneiland aangehou – terwyl jy huis toe gegaan het,” het Lekota gesê terwyl hy Ramaphosa in die oog gekyk het. “So, geluk dat jy ʼn miljardêr geword het. Maar hou jou miljarde vir jouself. Met jou wil ons niks te doen hê nie.”

Die nagevolge was dat die DA en EFF Lekota staande toegejuig het, en die EFF (wat gewoonlik geen goeie woord vir Lekota het nie) gedreunsing het: “Terror! Terror!”

Die EFF se onderleier, Floyd Shivambu, het in sy spreekbeurt vir Ramaphosa uitgedaag om hoofregter Mogoeng Mogoeng toe te laat om ‘n geregtelike kommissie van ondersoek aan te stel sodat Lekota se bewerings, en die band tussen Ramaphosa en die veiligheidspolisie ondersoek kan word – tensy hy iets het om weg te steek.

Shivambu het ook beweer dat die SAKP in die vroeë 1990’s Ramaphosa se aansoek om lidmaatskap afgekeur het, juis op grond van inligting oor sy kontak met die veiligheidspolisie.

En die ANC het dadelik teruggeslaan. Die minister van vroue in die presidensie, Bathabile Dlamini, het beweer dat Lekota tydens die bevrydingstryd ‘n slag van ‘n bus afgeklim het kort voor die insittendes, wat sy bevrydingstryd-kamerade ingesluit het, deur die apartheidstaat gearresteer is.

Die waarnemende KwaZulu-Natalse premier, Sihle Zikalala, het Lekota daaraan herinner dat hy enkele jare gelede ‘n boete van R11 000 moes betaal nadat hy nie sy belange in wynboubedrywighede korrek verklaar het nie.

Maar niemand in die ANC het Lekota se stellings probeer weerlê nie, en Ramaphosa het gelyk of ‘n trein hom getrap het, terwyl sy hoofsweep, Jackson Mthembu, langs hom gesit en hom op die oog af moed ingepraat het.

Boonop het die DA-LP Solly Malatsi onthul dat Ramaphosa weier om sy ooreenkomste met die maatskappy Bosassa openbaar te maak soos die DA-leier, Mmusi Maimane, hom versoek het.

Intussen het ander leiers van kleiner politieke partye ook hul toesprake gelewer.

Namens die Vryheidsfront Plus het die partyleier, dr. Pieter Groenewald, vir Ramaphosa daaraan herinner dat dit veel help hy beweer die Zuma-bewind was nege verlore jare – hy was Zuma se adjunk en meeloper.

Groenewald het gesê Ramaphosa moet onteiening sonder vergoeding dadelik stopsit. Hy het bygevoeg Suid-Afrika het oorgenoeg goeie ingenieurs om die gemors met swak bouwerk van kragstasies reg te stel, maar hulle is wit en verlaat die land weens wat Groenewald “die verswarting van die ekonomie” noem.

Groenewald het ook uitgewys dat Ramaphosa vele betuigings van medelye gedoen het, maar die slagoffers van die brugtragedie by die Hoërskool Driehoek in Vanderbijlpark uitgelaat het.

Hy het saamgestem met die minister van finansies, Tito Mboweni, dat dit ‘n fout is om Afrikaans as onderrigtaal aan die Universiteit van Pretoria uit te faseer, en onderneem dat die VF Plus die balans in die plaaslike politiek sal herstel.

Eerw. Kenneth Meshoe van die ACDP het gesê Ramaphosa was sedert 2014 medeverantwoordelik vir Eskom en is dus aandadig aan die kragvoorsiener se verval.

Die debat oor die staatsrede loop Donderdag ten einde met Ramaphosa se repliek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

164 Kommentare

jongste oudste gewildste
Snowball

Terror jou doring!! Net toe ons dink Ramaphosa kan nie nog geskok word nie, toe kry hy dié uitklophou. ‘n Jakkals verander van hare, maar nooit van streke nie!???

JJ

Hy is deur die NP ANC geskep. Het niks gehad nie en nou kan hy nog steeds niks regkry nie. Alles het in sy skoot geval vanaf die NP korrupte sogenaamde onderhandel laars. [email protected]!!!

Wiehan

Eina!!!!!

Wmts

Mooi so Terror!!!

Irene

Alles word nou slegter en slegter in SA