Lesotho-weermag se perde vrek van honger

Een van die perde op die kleinhoewe. (Foto: Verskaf)

Die Dierebeskermingsvereniging (DBV) in Bloemfontein het vandeesweek 68 perde van die Lesotho-regering se militêre eenheid uit hul sorg verwyder weens dieremishandeling.

Luidens ’n verklaring wat deur die DBV uitgereik is, het hulle gereageer op klagtes dat van die perde wat deur die eenheid op ’n kleinhoewe in Hobhouse in die Vrystaat aangehou word, van die honger vrek.

Die DBV het dié klagtes ondersoek waarna hulle op die karkasse van ses perde op die kleinhoewe afgekom het. Nóg drie het met hul aankoms plat op die grond gelê en was baie swak.

“Die perde het swaar asemgehaal en was in verskriklike pyn en lyding. Hulle kon nie opkom nie en was baie maer en verhonger. Die perde was ook totaal gedehidreer,” lui die verklaring.

Volgens die DBV was daar ook geen kos of weiding in die kamp waarin die perde aangehou is nie. Die veld waar die perde veronderstel was om te wei was ook heeltemal oorbevolk.

“Hulle het net daar gestaan en daar was geen emosie meer in hulle nie. Hulle het glad nie beweeg nie. Hulle koppe het gehang,” lui die verklaring.

Die DBV kon ná ’n ondersoek vasstel dat die perde aan die Lesotho-weermag behoort. Slegs een bevelvoerder versorg die diere op die kleinhoewe.

Verdere ondersoek het ook getoon dat die siek perde geen behandeling van ’n veearts ontvang het nie. Luidens die verklaring is sommige van die perde heeltemal blind en ander se hoewe weer erg beskadig wat tot gevolg het dat hulle moeilik loop. Ander het velkondisies opgedoen en hul pelse is in ’n haglike toestand.

Sommige van die perde moes van kant gemaak word, terwyl die DBV die oorblywende perde verwyder het. Hulle is tans in die DBV se sorg in Bloemfontein.

“Ek het tyd saam met die perde deurgebring en hulle dopgehou. Al die perde lyk depressief. Dit is ’n koue gevoel in hulle teenwoordigheid. Hulle toon geen emosie of teken van energie nie,” het Tebogo Maswanganye, inspekteur by die DBV, gesê.

“Dit is ’n skande dat so baie perde in die sorg van mense van die honger kan vrek. Dit is absoluut wreed; inteendeel, dit is skokkend,” het Maswanganye gesê.

’n Klag van dieremishandeling is intussen teen die regering aanhangig gemaak.

Om ’n bydrae tot die versorging van die oorblywende perde te maak, kontak die Bloemfonteinse DBV by 051 447 3801.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
San

Absolute skande dat die arme perde so mishandel word. Wat word van die mensdom?

Diefie

Dit is maar weereens ‘n bewys dat daar sekere mense in die leweis, wat nie ken van opbou nie.

Nienie

Stomme diere. Ek het nie woorde nie. Hoekom VRA die mense nie vir hulp nie?

Maro

Die onvermoë strek wyd. En dis werklik nie ñ moeilike taak nie.

Jaco

Tipies kraai, kan na niks kyk nie en omsien nie.