Lesufi: ‘AfriForum probeer my vermoor’

kallie-kriel-2019-05-02

Kallie Kriel, die uitvoerende hoof van die burgerregte-organisasie AfriForum. Foto: Verskaf.

Panyaza Lesufi, LUR vir onderwys in Gauteng, het tydens ʼn mediakonferensie gesê die burgerregte-organisasie AfriForum het hom probeer vermoor en teister hom en sy gesin.

“Hulle het my al probeer vermoor, my en my gesin agtervolg, deur my bankstate probeer gaan en probeer uitvind wie my vriende is,” het Lesufi Sondag gesê. Hy het gereageer op AfriForum se versoek aan Gautengse premier David Makhura dat hy bedank. AfriForum het ook ʼn strafregtelike klag van korrupsie en wanbesteding teen Edward Mosuwe, hoof van die Gautengse departement van onderwys, gelê.

In reaksie hierop het Kallie Kriel, uitvoerende hoof van AfriForum, gesê Lesufi moet hom maar regmaak vir ʼn “stewige lastereis” van AfriForum. “Ek het geweet Lesufi huiwer nie om twak te praat nie, maar het nie gedink dat selfs hý sulke nuwe laagtepunte kan bereik met sy uitsprake en buitensporige samesweringsteorieë nie.”

Edward Mosuwe en Panyaza Lesufi (regs) Sondagoggend gedurende ‘n mediakonferensie. (Foto: ANA)

Lesufi het joernaliste Sondag op hoogte gebring van plasings in Gautengse skole vir volgende jaar. Meer as 9 000 gr.1- en gr. 8-leerders soek nog plek in ʼn skool in Gauteng. Dit verteenwoordig amper 4% van die totale aantal leerders wat in Mei vanjaar aanlyn aansoek gedoen het om ʼn skool.

Lesufi sê baie van die leerders is tot dusver geakkommodeer deur lokale soos gimnasiums by skole in klaskamers te omskep. “Ons het nie klaskamers oorvol geprop nie. Geen skool is ook gedwing om leerders in te neem as hulle nie wou nie,” sê Lesufi. “Ek deel ouers se frustrasie. Dit is nie ʼn stelselfout nie. Daar is net té veel aansoeke.”

Die Menseregtekommissie het reeds aangedui dat hulle ʼn klag van die Suid-Afrikaanse Instituut vir Rasseverhoudinge en die VF Plus oor die aanlyn aansoekstelsel ondersoek.

Volgens Lesufi het 160 000 ouers aansoek gedoen vir 12 000 plekke by 394 skole in Gauteng. “Sommige skole is dus baie gewild en ons kan onmoontlik ouers met hul eerste keuse akkommodeer.” Dit terwyl sommige skole, veral in township-gebiede, slegs 14 aansoeke ontvang het. Gebiede wat veral onder druk is, is Centurion, Alberton en dele van Midrand.

Lesufi sê wanneer laat aansoeke in Januarie oopmaak, sal ouers slegs kan aansoek doen vir dié skole wat plek het.

Hy het ook gekap na kritici wat hom kasty oor hy te min skole bou. “Ons het genoeg skole, maar ouers verkies enkele skole in die provinsie. Dit is verstaanbaar, want sommige skole het ʼn hoë voorkoms van geweld.”

Henk Maree, AfriForum se woordvoerder, het bevestig dat hulle besig is om ʼn lastereis teen Lesufi in te stel weens sy uitlatings Sondag. Hy het dié uitlatings as “totale waansin” bestempel.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

63 Kommentare

jongste oudste gewildste
BJ Vorster

Ek dink ‘n “Lesufi must fall” veldtog is nou nodig want hierdie man is heeltyd besig met alles behalwe onderwys!
Ek glo Afriforum gaan hom ry tot by ou Daantjie in die kalwerhok en hom ‘n les of twee leer!

Swartwolf

Alle sterkste en sukses aan Afriforum.

sdp

Haha alweer die nar

Stormjaers

Hoe verloop die ander provinsies se plasings. Is daar ook leerders wat nog in n skool plek moet kry.

Arak

Al weer die slagoffer, fooitog.