Lesufi ‘misken’ Afrikaanse skole se prestasie

Panyaza Lesufi. (Foto: Verskaf)

Die LUR vir onderwys in Gauteng, Panyaza Lesufi, word van “blatante politiekery” beskuldig nadat hy Woensdag tydens ’n spesiale erkenningsgeleentheid vir die klas van 2020 versuim het om erkenning aan die provinsie se toppresterende skole te gee. Die meerderheid van dié skole is enkelmedium Afrikaanse openbare skole.

Lesufi het in sy toespraak gesê hy is veral bëindruk met die prestasie van die provinsie se informele nedersettings. Hy het ook daarop gewys dat al 15 distrikte van die provinsie bo die nasionale gemiddeld van 76,2% presteer het.

Die LUR het egter nie ’n woord gerep oor skole in die provinsie wat die meeste onderskeidings ingeryg het nie. Altesaam nege uit die tien toppresterende skole is Afrikaanse skole, met die uitsondering van Pretoria Boys High School. Dié skole het almal tussen ʼn 98%- en 100%-slaagsyfer.

Melanie Buys, hoof van ontwikkeling by die Skoleondersteuningsentrum (SOS), meen dit is juis dié skole wat die distrikte so goed laat presteer het.

(Argieffoto)

Buys sê Gauteng se toppresterende skole het uitstekende prestasies behaal met min ondersteuning van die departement van onderwys en nóg minder ondersteuning van die LUR wat veral druk op Afrikaanse skole uitoefen om te verengels.

“Die toppresterende skole behoort erkenning te kry vir uitsonderlike prestasie in ’n baie moeilike jaar.”

Natasha Venter, bestuurder van onderwysregte by AfriForum, sê dit is duidelik dat die LUR se “politieke onderrok ver uitsteek” met die miskenning van die toppresterende skole se uitsonderlike prestasies in die 2020-skooljaar.

“Die feit dat hy nie eers bereid is om die leerders en onderwysers van hierdie toppresterende skole te noem nie, bloot omdat byna almal Afrikaanse enkelmediumskole is, is ’n verdere bewys dat Lesufi nie sal afsien van sy politieke agenda om Afrikaanse skole te ondermyn nie,” meen Venter.

“AfriForum wil graag al hierdie presteerders en die onderwysers wat hard gewerk het in ’n moeilike jaar gelukwens en aan hulle die versekering gee dat ons sal voortgaan om teenstand teen Lesufi se vooroordele en benadeling van Afrikaanse skole te bied.”

Die onderstaande tabel toon Gauteng se topskole bereken volgens die getal onderskeidings. Groot skole met meer matrikulante het wel ’n voorsprong wat die aantal onderskeidings betref.

Skool Getal onderskeidings
Hoërskool Waterkloof1 021
Hoërskool Menlopark850
Hoërskool Garsfontein733
Afrikaans Hoër Meisieskool673
Hoërskool Zwartkop562
Hoërskool Eldoraigne551
Afrikaans Hoër Seunskool542
Pretoria Boys High School491
Hoërskool Noordheuwel478
Hoërskool Montana436
Sutherland High School383
Pretoria High School for Girls382
Parktown Girls High School367
King Edwards VII School320
Hoërskool Monument300
Rand Park High School293
Hoërskool Transvalia265
Hoërskool Oos-Moot260
Edenglen High School259
Jeppe Girls High School251

Gauteng se klas van 2020 het ’n algehele slaagsyfer van 83,8% behaal – ’n afname van 3,5% teenoor die provinsie se algehele prestasie in 2019. Die jongste slaagsyfer plaas Gauteng nietemin in die tweede posisie op nasionale vlak.

Maroela Media het Donderdag ’n navraag aan die departement van onderwys gerig rakende die LUR se versuim om erkenning aan die toppresterende skole te gee en wag steeds op terugvoer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
Genis

Ek misken hom ook… Ek is trots Afrikaans! Trots…Kom ons se eerder Windgat Afrikaans

Misky

Ons het seker niks minder as dit van hom verwag nie. MAAR ons weet en hy weet goed wat ons dink….. en dis die beste en trotste gevoel vir ons Afrikaners. Ons kan en ons het en ons gaan weer en bewys dit oor en oor!!!! Ek dink dit hou hom snags uit die slaap

SomeOne

moenie te veel stress oor lesoefie, hy kan nie kleur onderskei nie, ons top presteer kinders sal op media geloof word, en nie deur ‘n enkele waar wit nie bestaan nie

Persheks Adri

Want die kinders is afrikaans en blank die verdomde ou ‘n rassis pffft. Nie asof die swart staat ons blanke kinders help nie! Ons sal self!

marius

wat maak dit saak wat lesufi dink