Lesufi trek sluipmoordklag teen AfriForum terug

Panyaza Lesufi. (Foto: Verskaf)

Panyaza Lesufi, die Gautengse LUR vir onderwys, het sy bewerings dat die burgerregte-organisasie AfriForum ʼn “sluipmoord” op hom wou uitvoer, amptelik teruggetrek.

Lesufi het in November 2019 dié bewerings tydens ʼn mediakonferensie in Johannesburg gemaak en gesê die organisasie het selfs sy kinders agtervolg.

Die LUR het nou, jare later, vir AfriForum gesê hy is spyt dat hy dié bewerings gemaak het.

In ʼn gesamentlike verklaring wat deur die twee partye uitgereik is, meen Lesufi dat sy destydse bewerings in ʼn groter konteks beskou moet word, aangesien hy gereeld gebuk gaan onder aanvalle uit alle sfere van die samelewing.

Kallie Kriel, uitvoerende hoof van AfriForum, sê die feit dat Lesufi nou sy bewerings teen AfriForum terugtrek, bevestig net dat die uitlating blatante leuens was.

AfriForum het Lesufi verlede jaar vir laster gedagvaar, maar gesê die dagvaarding sal teruggetrek word indien hy sy bewerings in sy amptelike hoedanigheid terugtrek.

“Aangesien die LUR se erkenning aan AfriForum se eise voldoen, is daar geen rede om met die lasteraksie teen hom voort te gaan nie,” sê Kriel.

“Die belastingbetalers se geld sou ongelukkig vir Lesufi se regskoste gebruik word, maar omdat miljoene belastingbetalers se geld reeds deur sy departement – met die skandaal rakende die sanitasie van skole – geplunder is, wil AfriForum verhoed dat nóg geld op Lesufi se regskoste vermors word.”

Luidens die partye se verklaring erken Lesufi dat sy uitsprake rakende AfriForum ʼn skeuring tussen die twee veroorsaak het.

“Desnieteenstaande verbind die partye hulle daartoe om in gesprek te tree om ʼn herhaling van só ʼn situasie te voorkom en enige probleme wat in die toekoms ontstaan, aan te pak.

“Albei partye het hul menings, maar hulle het vantevore byeengekom om oor kwessies te debatteer en is daartoe verbind om dit voortaan weer te doen.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

34 Kommentare

jongste oudste gewildste
MakersMark

Dis waarskynlik lede van sy eie party wat hom wil dood hê……

Johannes

Lesufi moes aanspreeklik gehou geword het vir sy uitlating. As Hofmeyr so iets oor die ANC sou kwyt geraak het, was dit voorblad nuus.

Blikke

Wat n Nar!!!

H.A.

Lesufi kom te maklik weg met sulke aantygings. Die eier het klaar op die grond geval. Ons probleem is dat ons te gou vergewe en vergeet.

JM

Lesufi is al bekend vir sy groot mond, wat dink hy kan net sê en doen wat hy wil. Hy het besef dat hy hom lelik sou vasloop met Afriforum. Minder praat en belowe, Lesufi! Waar is al die skole wat hy sedert die begin van die jaar sou bou?