Lichtenburg-man vra borgtog ná seun (15) se dood

Lichtenburg. Argieffoto: ANA

Jaco du Plooy (46), ʼn inwoner van Lichtenburg in Noordwes, het Donderdag in die dorp se landdroshof verskyn in verband met ʼn skietvoorval vandeesweek waarin ʼn 15-jarige seun tydens ʼn gewelddadige betoging doodgeskiet is.

Du Plooy, wat werksaam is in die boubedryf, staan tereg op ʼn aanklag van moord en twee aanklagtes van poging tot moord.

Hy word daarvan beskuldig dat hy Dinsdagoggend vir Spencer Tshukudu van Blydeville, vermoedelik ʼn betoger, op die Boikhutso/Lichtenburg-pad doodgeskiet het. Twee jeugdiges, onderskeidelik 17 en 20 jaar oud, is tydens die skietvoorval gewond.

Peet du Plessis, Du Plooy se regsverteenwoordiger, het Donderdag aan Maroela Media gesê sy kliënt het in ʼn vol gepakte hof formeel om borgtog aansoek gedoen. Du Plooy voer aan hy het glo skote gevuur om homself te verdedig nadat betogers hom en sy werkers die oggend in sy voertuig met klippe bestook het.

Die staat het die aansoek teengestaan en hanteer die saak as ʼn skedule 5-misdryf.

Die staat het die ondersoekbeampte in die saak geroep om te getuig. Die staat het aangevoer borgtog moet geweier word, aangesien dit die openbare orde gaan versteur en Du Plooy se lewe in gevaar gaan wees as hy vrygelaat word.

Du Plessis het aangevoer die hof moet met sy beslissing kan bewys dat dit wel die geval sal wees, sou borgtog toegestaan word. Hy het gesê Du Plooy is bereid om verhoor te word.

Die landdros het sy uitspraak voorbehou en sal dit op 19 Oktober lewer. Du Plooy bly tot dan in aanhouding.

Nagenoeg 2 000 betogers het buite die hof teen Du Plooy se vrylating betoog.

Maroela Media het vroeër berig die skietvoorval het gevolg nadat ʼn groep inwoners van Blydeville vroeër die oggend die dorp se strate ingevaar, verskeie paaie met voorwerpe versper en ook ʼn vragmotor geplunder en aan die brand gesteek het. Die inwoners betoog oor ʼn tekort aan dienslewering en bewerings van korrupsie in die munisipaliteit. Hulle dring onder meer aan op bekostigbare behuising, ʼn kliniek wat 24 uur per dag oop is en ʼn skool.

Betogers het vroeër vanjaar ook die strate ingevaar om oor dienslewering te betoog. Die betogers het op 24 Mei vir Daniel Buthelezi, die burgemeester van die Ditsobola-munisipaliteit, gyselaar geneem en ʼn gedeelte van die munisipale gebou aan die brand gesteek. Buthelezi is ure later bevry.

Spencer se ouers, Willem Mothoki (41) en Dorah Tshukudu (45), het Woensdag aan African News Agency gesê hulle is gebroke oor hul seun se dood.

Mothoki het gesê hy het die oggend sy seun in die straat gesien en hom aangesê om huis toe te gaan. Mothoki is daarna werk toe en is later ingelig sy seun is doodgeskiet. Joseph Esemang, wat beweer hy het die skietvoorval sien gebeur, het aan die verslaggewer gesê Spencer was nie deel van die betoging nie “en wou net motoriste waarsku oor die paaie wat versper was”.

Spencer Tshukudu.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

71 Kommentare

jongste oudste gewildste
MERAAI

Ag shame………………….. en die boere wat vermoor word????????

Frikkie (Nie pienk)

Hy wou net motoriste waarsku oor die paaie wat versper was!!!!! Glo my vry!!

Ouma

Ja nee, tronk is jou voorland as jy jouself en jou werkers probeer verdedig teen ‘n klipgooiers wat nog ‘n kind is, en op die skoolbanke moes wees. Motoriste is al dood en het breinskade opgedoen agv ‘n klip wat deur ‘n motorvenster gegooi is. Maar dit is mos niks. Hoe gaan die toekoms lyk met kinders wat nou al so mooi geleer dat geweld die antwoord is? Hierdie is ‘n erfenis van die ANC. Hulle het die volk geleer dat oproer die goed en reg is, en nou sit hulle met die gebakte pere.

Racheltjie

Wat verwag die reg….hoe moes die man homself en sy kind beskerm het?

EJ

Ag al weer dieselfde storie. Vir sy eie veiligheid. Ja nee kyk as dit anders om was sou daardie persoon klaar borg gekry het. Dis n sirkus.