Lielie Muis ‘is veilig by Jesus’

Leah de Jager. (Foto: Annelie Jonker Photography)

Leah de Jager, die ses maande oue dogtertjie van Uitenhage wat weens ʼn seldsame mediese toestand sonder ʼn immuunstelsel gebore is, het Maandagoggend gesterf.

Die tragiese nuus is bevestig in ʼn inskrywing op die Facebook-ondersteuningsblad vir “Lielie Muis” soos haar pa, Gerrit de Jager, na sy babadogtertjie verwys.

“Liewe Jesus het sy mooiste blommetjie kom haal vanoggend. Ons harte is bitter seer, maar ons weet sy is veilig in Jesus se hande. Rus sag kleine Lielie Muis. Almal gaan jou mis. Jy het baie mense aangeraak en los diep spore in ons harte,” lui die inskrywing.

Maroela Media het vroeër berig Leah is in Oktober verlede jaar met ernstige gekombineerde immuungebrek (SCID) gediagnoseer. Dit beteken dat sy in effek geen immuunstelsel het nie en haar liggaam dus geen vermoë het om teen infeksies, bakterieë en kieme te baklei nie.

Leah de Jager by haar ouers, Lezaan en Gerrit. (Foto: Annelie Jonker Photography)

Leah is in die neonatale waakeenheid van die Dora Nginza-hospitaal in Port Elizabeth opgeneem en het sedertdien daar om haar lewe geveg. Dokters het alles in hul vermoë gedoen om die babadogtertjie te help, maar verlede maand het Gerrit aan Maroela Media gesê daar is niks meer wat dokters vir haar kan doen nie.

Gerrit en Lezaan, Leah se ouers, het Donderdag gesê Leah was in daardie stadium vier dae sonder enige stuiptrekkings en dat sy rustig is en slaap. “Dit is net die Here wat haar so rustig maak en rustig hou,” het hulle gesê.

Boodskappe van medelye het Maandagoggend op sosiale media ingestroom. “Rus in vrede klein blom. Liewe Jesus het sy mooiste blom kom haal.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

45 Kommentare

jongste oudste gewildste
Elria

Ons innige meegevoel met Jul Engel kind se heen gaan. God Sal Jul in die moeilike tyd vashou en AL Jul trane afvee. Bid vir julle in die tyd. Elria Jordaan is

Lollie

So tragies! Sy was bitter siek vir so klein mensie en ons dank God dat Hy haar vir julle geleen het.
Vir die ouers is dit baie moeilik maar niemand weet wat daardie klein mensie deurgemaak het nie.
Sterkte!

Yankee

Aan die ouers. So jammer om te lees!! Woorde kan nie beskryf.

Zandra

baie sterkte aan almal wat so hartseer soos ek is.
jy’t so diep in almal se harte geklim MUISkind
Jesus gaan jou troos en veilig hou tot mamma en pappa saam jou daar is
Sterkte Lezaan en Gerrit ons dink en dra julle op aan die Vader

Willie

Trane in die oe… Mag God jul styf vashou in die tyd! Baie sterkte aan die familie