Liggaam op strand toe nie dié van Britse burger

Die vrou wie se liggaam Saterdag op ʼn strand by Durban aangetref is, is nie ʼn Britse burger soos voorheen vermoed is nie.

Maj. Thulani Zwane, woordvoerder van die polisie, het gesê Charmaine de Lange (53), wie se liggaam tussen Batterystrand en die gewilde Sun Coast Casino-strand aangetref is, is intussen deur haar dogter geëien. Sy is ʼn Suid-Afrikaner en woon in Umbilo in Durban.

Sy het glo haar huis op 31 Desember verlaat en is dieselfde dag as vermis by die polisie aangemeld.

Maroela Media het vroeër berig die polisie het aanvanklik vermoed dat die oorledene ʼn Britse burger is aangesien ʼn Britse paspoort by die liggaam aangetref is. Zwane kon nie Maandag bevestig aan wie die paspoort behoort of hoe dit daar gekom het nie.

De Lange se liggaam is in ʼn hurkposisie aangetref met geen ooglopende uitwendige beserings nie. “Die polisie vermoed geen gemene spel nie na aanleiding van bewysstukke wat by die liggaam en by haar huis gevind is,” het Zwane gesê.