Lily-myn: Soektog na myners se oorskot hervat

‘n Lugfoto van die ineenstorting op 5 Februarie 2016 van Vantage Goldfields se Lily-myn. Foto: JacarandaFM via Mpumalanga EMS

Die soektog na drie myners wat in Februarie 2016 ondergronds vasgekeer is in die Lily-myn in Barberton, Mpumalanga, word in September voortgesit.

Die drie mynwerkers, Pretty Nkambule, Solomon Nyerende en Yvonne Mnisi, is in ‘n skeepshouer vasgekeer toe ‘n storting plaasgevind het.

Rob Devereux, Lily-myn se sakereddingspraktisyn, het aan African News Agency gesê die maatskappy het uiteindelik befondsing van die Kanadese maatskappy Galane Gold verseker.

Devereux het gesê reddingswerkers  moet verskeie stappe volg om die oorskot van die werkers na die oppervlak te bring.

Volgens Devereux het Lily nog nie die fondse van Galane Gold ontvang nie omdat hulle nog deur prosesse gaan en kontrakte teken.

Reddingspogings is destyds kort ná die voorval van stapel gestuur, maar is later gestaak omdat die myn onveilig verklaar is. Lily-mynwerkers het sedert die voorval vrywillige pakkette geneem en die maatskappy verlaat. Devereux het Donderdag gesê die myn het nog steeds nie vir ander werkers hul uitstaande lone vir April en Mei 2016 betaal nie.

Devereux meen die geld van Galane Gold sal gebruik word om werkers te betaal en die myn weer in werking te stel sodra die reddingspoging verby is.

“Sodra ons die geld ontvang, sal ons die mense betaal en hulle sal dan weer begin werk. Ons sal ook voorkeur gee aan huidige werkers wanneer die mynbedrywighede weer begin,” het hy gesê.

Thabo Mokoena, Cosatu se provinsiale sekretaris, het gesê die vakbondfederasie is nie bewus van die feit dat Lily-myn geld by ʼn maatskappy verseker het nie. Hy het ook bevestig die departement van minerale hulpbronne het R200 000 aan elke slagoffer se familie betaal soos verlede jaar belowe is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

12 Kommentare

jongste oudste gewildste
Koos1

Sonder om onsesitief te wees, die R200 000.00 is nie deur die departement van minerale hulpbronne betaal nie. Dit is DEUR hulle oorbetaal, die geld kom van die belasting betaler af!

Ontsteld

Ontsteld soos wat ek is oor die rassistiese slange se aanmerkings aangaande die gebeure in Kaapstad en Knysna net so teenoorgesteld is ek as Christen oor die ramp wat hierdie myn getref het. Mag familie uiteindelik berusting kry alhoewel ek wat ook op/in ‘n myn gewerk het die herwinning van die slagoffers as uiters gevaarlik beskou.

Deon

Daardie skeepshouer sal so plat soos n pannekoek wees. Dink net aan al die tonne rots en grond wat bo-op dit geval het. Ek dink dit is soos om met n kar oor n leë koeldrankblikkie te ry. En bestuur MOES dit geweet het maar het die naasbestaandes nog vir weke laat hoop op niks. Ek dink dit was baie wreed.

Reti

Wat ‘n mors van geld. Hulle wéét mos waars hul mense. Soos die Coalbrookongeluk kan hulle gedenksteen vir mense wat reeds begrawe is opsit. Dis hartseer maar iewers moet mens maar opgee.

Leeann

Cherokee dit is waar. Dit is ook so op die bordjie vermeld. Daar was nooit demands om haar liggaam te herwin nie