Limpopo-polisie vernietig daggaplantasie

Die polisie in Limpopo het Vrydag dagga met ʼn straatwaarde van nagenoeg R5 miljoen vernietig in Louis Trichardt.

Volgens brig. Hangwani Mulaudzi, woordvoerder van die polisie, het polisiebeamptes Vrydag op ʼn daggaplantasie met 840 daggabome afgekom. Mulaudzi het gesê die plantasie was op munisipale gronde.

Die plantasie is aan die brand gesteek. Mulaudzi het gesê die eienaar van die plaas was nie tuis nie. “Ons kon hom nie vind nie maar ons het op gesteelde goedere afgekom en dit na die plaaslike polisiestasie geneem.”

Die polisie het ook talle honde van die plaas verwyder.