Lisensiekantoor-korrupsie: Ses in hof

Argieffoto: www.services.gov.za

Argieffoto: www.services.gov.za

Ses amptenare van Johannesburg se lisensiedepartement het Donderdag in die gespesialiseerde handelsmisdaadhof verskyn, in verband met beweerde korrupsie van meer as R4 miljoen.

Kapt. Ndivhuwo Mulamu, woordvoerder van die Valke, het gesê Victor Nkosi, Nompumelelo Olifant, Quimaal Sallie, Andre Witte, Mildred Njody en Micah Moyo is almal op borgtog van R5 000 elk vrygelaat. Nkosi, Olifant, Sallie en Witte sal op 14 Februarie weer in die hof verskyn, terwyl Njody en Moyo op 1 Maart weer in die beskuldigdebank sal wees.

“Drie van die verdagtes is in die week by hul huise in Soweto en Florida in hegtenis geneem, terwyl die ander drie, vergesel van hul regsverteenwoordigers, hulle by die Valke se kantoor in Johannesburg oorgegee het,” het Mulamu gesê.

“Die beskuldigdes het na bewering lede van die publiek, wat die departement besoek het, se uitstaande verkeersboetes van die stelsel verwyder sodat hulle hul bestuurslisensies en motorslisensieskyfies kon hernu, in ruil vir omkoopgeld.”

Mulamu het gesê altesaam 14 beamptes wat by lisensiekantore in Johannesburg werk, is al in hegtenis geneem. Nog inhegtenisnemings word binnekort verwag.

Maroela Media het vroeër berig ʼn ondersoek deur die stad se interne forensiese ondersoekeenheid, onder leiding van genl. Shadrack Sibiya, het grootskaalse korrupsie by die Johannesburg-lisensiedepartement oopgevlek. Volgens die verslag het die stad R14 717 444 in 972 beweerde korrupte transaksies verloor.

Altesaam 72 beamptes is reeds uit hul poste geskors.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

11 Kommentare

jongste oudste gewildste
lizel

Selfde gebeur by Akasia!!

PietM

Ek verstaan nie hoekom bestaande boetes se inligting van die stelsel verwyder moes word alvorens hulle lisensies kon hernu nie. Hernuwing van lisensies hou nie verband met boetes nie. Daar is ander prosedures wat gevolg moet word om die uitstaande boetes te in.

Gerda

So ver my kennis strek moet die stelsel nagegaan word vir uitstaande boetes alvorens die hernude lisensieskyf uitgereik word.

Lewies

Wat was die aanstellingsprosedure en vereistes gewees? Werkswaardes en integriteit moet tog deel van die voorwaardes wees vir aanstellings!! Leer die mense in beheer van aanstellings dan niks uit al die bedrogsake in hierdie land van ons nie? Miskien sal dit help om die wat aanstellings maak ook aanspreeklik te hou vir die werksprestasie van elke amptenaar in die staatsdiens en ander poste.

Luchia Swartz

ek hoop hul ondersoek pretoria se takke ook erg