Listeriose-uitbreking: Dís wie skuldig is, sê Motsoaledi

Dr. Aaron Motsoaledi. Foto: Flickr/GovernmentZA

Aaron Motsoaledi, minister van gesondheid, het Sondag die vinger na Enterprise Foods se Polokwane-fabriek gewys as die skuldige onderneming wat die listeriose-uitbreking in Suid-Afrika betref.

Motsoaledi het tydens ʼn mediakonferensie by die Nasionale Instituut vir Oordraagbare siektes (Nios) gesê nagenoeg 180 mense het tot dusver aan dié uitbreking gesterf. Volgens hom is altesaam 948 al met die siekte gediagnoseer.

Motsoaledi het gesê daar is onderhoude gevoer met altesaam 109 mense wat listeriose het om te probeer bepaal watter kossoorte hulle geëet het kort voordat hulle siek geraak het. Volgens hom het 93% van die mense aangedui dat hulle in die afgelope paar maande verwerkte vleis soos polonie, Weense worsies en ander kouevleissnitte geëet het.

Volgens hom het dit aan die lig gekom nadat nege kinders jonger as vyf jaar in die Chris Hani Baragwanath-hospitaal opgeneem is. Die pediater het glo vermoed dat listeriose ʼn moontlike oorsaak vir hul hospitaalopname kon wees, waarna ʼn ondersoek na die crèche wat hulle huisves van stapel gestuur is. Twee polonie-handelsmerke is glo aan toetse onderwerp en het positief vir listeriose getoets.

Verskeie groepe, onder wie die wêreldgesondheidsorganisasie, het Enterprise Foods se Polokwane-fabriek daarna besoek en ʼn uitgebreide voedselproduk- en omgewingsmonsterneming uitgevoer.

Die uitbrekingsbakterie, bekend as ST6, is gevind in minstens 16 omgewingsmonsters van die fabriek. Die bakterie kom glo natuurlik in die omgewing voor.

Die meeste gevalle van listeriose is sedert die uitbreking in Gauteng aangemeld.