‘Los hom uit’, sê Magashule oor Zuma

Ace Magashule, sekretaris-generaal van die ANC. (Foto: Twitter)

Ace Magashule, sekretaris-generaal van die ANC, meen daar is geen rede om oudpres. Jacob Zuma uit die regerende party te skors nie.

“Los hom uit. Wat is die probleem?” wou ‘n duidelik geïrriteerde Magashule weet nadat joernaliste hom Woensdag in Soweto oor Zuma se optrede uitgevra het.

“Pres. Zuma is pres. Zuma. Ek kan nie namens hom praat nie,” het Magashule, wat self op 21 aanklagte van onder meer bedrog, korrupsie en geldwassery teregstaan, gesê. “Pres. Zuma is ʼn Suid-Afrikaner en het sy eie regte.”

Zuma het Maandag ondanks ʼn bevel van die Konstitusionele Hof aangedui dat die Zondo-kommissie van ondersoek na staatskaping geen verdere samewerking van hom in enige van sy toekomstige prosesse kan verwag nie.

“Ek vrees nie inhegtenisneming nie, ek vrees nie skuldigbevinding nie en ek vrees dit ook nie om opgesluit te word nie,” het die beleërde oudpresident gesê.

Die Zondo-kommissie het in reaksie gesê dit blyk dat Zuma homself verhewe bo die Grondwet  beskou. Die kommissie het ook aangedui dat hy strafregtelike klagte teen Zuma sal indien.

Oudpres. Jacob Zuma. (Foto: Sandile Ndlovu/Pool)

Oor eise dat Zuma uit die ANC geskors word en op ʼn vraag aan Magashule oor of die party dit oorweeg, het hy geantwoord: “Nee. Hoekom moet ons ʼn persoon skors wat glo in wat hy glo? Pres. Zuma het die reg om te doen wat ook al hy wil. Ons het nog nie hierdie kwessie bespreek nie. Ek kan nie insien wat die kwessie is nie.”

Die DA het intussen die Zondo-kommissie se voorneme om Zuma strafregtelik aan te kla, verwelkom. Adv. Glynnis Breytenbach, DA-woordvoerder, meen daar moet dringend stappe deur wetstoepassingsagentskappe gedoen word om te verseker dat die klag geregistreer word en dat Zuma boonop verplig word om te getuig tydens sy geskeduleerde verskyning vir die week van 15 tot 19 Februarie.

“Veral die Suid-Afrikaanse Polisiediens (SAPD) moet voorbereid wees om Zuma in hegtenis te neem indien hy nie opdaag nie. Indien hy met sy beplande uittarting voortgaan, moet Zuma in hegtenis geneem word en die gevolge van sy afskuwelike gedrag die hoof bied, net soos enige ander burger,” het Breytenbach gesê.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

52 Kommentare

jongste oudste gewildste
Stefan

Die anc het al die jare bankvas agter hierdie 2 gestaan terwyl daar duidelike tekens van korrupsie was/is.
Dit bewys mos dat die hele anc korrupt is en dan staan die merendeel van die kiesers weer bankvas agter die anc.
Met ander woorde: ons kan droom dat dit in die toekoms beter gaan, maar dit gaan nie gebeur nie.
Jammer dat ek so moedeloos klink.

Pieter

Een woord vir julle ANC sirkus VOETSEK

Spyker

Broeders in misdaad!!!

Jackie

Natuurlik sal hy dit sê. Hyself moes lankal geskors gewees het.

Pieter

“Pres. Zuma is ʼn Suid-Afrikaner en het sy eie regte.”
Dis die probleem, julle verstaan nie die betekenis van REG-TE nie. Julle maak staat op julle REG-TE om misdaad te pleeg. Maar die wiel draai en so ook sal die REG-TE draai na TE-REG.