‘Los ons Steve uit!’

Steve Hofmeyr en Danie Langner. Foto: Theana Breugem

‘Los ons Steve uit!’

Só het dr. Danie Langner, besturende direkteur van die Federasie van Afrikaanse Kultuurvereniginge (FAK), Donderdagaand voor ’n skare van sowat 2 000 mense in die Voortrekkermonument se amfi-restaurant in Pretoria, gesê.

Hofmeyr is met ’n FAK-prestige-prys vir die bevordering van Afrikaanse musiek die afgelope drie dekades vereer tydens ’n dankie sê-konsert waar hyself, Jak de Priester, Monique Steyn, Pieter Smith, Dewald Wasserfall en Demi Lee Moore opgetree het. Die kunstenaars het ook hulde aan Hofmeyr gebring deur van sy liedjies te sing.

’n Video wat Hofmeyr se lewe en loopbaan opsom, asook video’s van Carike Keuzenkamp, Johan van Rensburg en sy vrou, Rina Hugo, waar hulle huldeblyke aan hom lewer, is op groot skerms vertoon.

Steve Hofmeyr. Foto: Theana Breugem

Langner het in sy toespraak spottenderwys gesê Bruce Beyers het ’n suksesvolle loopbaan begin as ’n Afrikaanse sanger en akteur onder die skuilnaam Steve Hofmeyr. Hofmeyr het in die 1980’s dié rol vertolk in die TV-reeks Agter elke man.

“Ons weet hensop, oorgee, onderdanig, jabroer, kniebuig, kuddedier, massamens en lafaard was nooit deel van Bruce Beyers se mondering nie en is nog minder deel van Steve se woordeskat,” het Langner gesê.

“Op ’n unieke manier verteenwoordig Steve die onverskrokke waagmoed, besliste dryfkrag en voorop-die-wa hardkoppigheid van Afrikaners. Hy gee inhoud aan woorde soos vasstaan, opstaan, sterk staan.

Steve Hofmeyr en Demi Lee Moore. Foto: Theana Breugem

“Dit is die kulturele ruggraat van Afrikaners. Dit is die gees en karakter wat ons in Steve sien en wat soveel Afrikaners inspireer en moed gee. Vir die napraters, beswaardes, onderdrukkers, veroordelaars, beterweters, regeringspapegaaie en selfaangestelde sensuurraad sê tannie Stienie (in Agter elke man): Los ons Bruce uit! Die ‘ou lady’ mag sommiges kwaad maak, maar wie is ons om met tannie Stienie te stry? Ons sê ook ‘los ons Steve uit!’”

Hofmeyr het gesê dit was ’n stormagtige drie dekades. “Ek dink baie mense lees my verkeerd. Ek wil eintlik net sing. Ek wil komponeer en dig, toneelspeel en ’n bietjie toer. Ek vra min. Ek vra om weer ’n sanger te word en nie saans te huil oor die lot van ons mense nie. Voor ek doodgaan, wil ek weer ’n boerseun wees wat sy volksliedjies mag sing en sy vlag mag laat wapper. Ek is nie ’n goeie boekhouer nie – ek is so sleg om my woorde te tel.”

Steve Hofmeyr. Foto: Theana Breugem

Langner sê niemand kan wegredeneer dat Hofmeyr verskriklike diep spore in die Afrikaanse musiekbedryf getrap het nie.

“Die FAK gee as kultuurorganisasie vir Steve erkenning vir sy bydrae tot die kultuur. Die FAK beoordeel nie die persoonlike standpunte van die kunstenaars aan wie ons erkenning gee nie, maar ons voel baie sterk daaroor dat ons erkenning moet gee waar dit verdien word. Dit is deesdae hoogmode om etikette aan mense te hang as hulle ’n standpunt stel wat nie politiek korrek of gewild is nie, maar dit is nie te sê dis die definisie van rassisme of dat iemand ’n rassis is nie.

“Behalwe dat die huldiging ’n dankie is vir Steve se kultuurbydrae, is dit ’n baie duidelike ‘ja’ en ook ’n baie duidelike ‘nee’,”sê Langner verder. “Dit is ’n ja vir vryheid van denke, vryheid van spraak, die reg om jou standpunt te mag stel en vir oop gesprek. Maar dit is ook ’n nee teen sensuur.”

Hofmeyr, sy vrou Janine en hul dogtertjie Romy-lee. Foto: Theana Breugem

Die FAK gee sedert 1937 erkenning aan Afrikaanse kunstenaars toe die eerste FAK-Sangbundel bekendgestel is. Die afgelope paar jaar het die FAK erkenning aan verskeie Afrikaanse kunstenaars gegee wat sedert die tagtigerjare ’n reuse bydrae gelewer het in die ontwikkeling van Afrikaanse musiek.

In die 2012 FAK-Sangbundel, wat in 2016 herdruk is, is van Hofmeyr se gewildste liedjies soos “Pampoen”, “Agter elke man”, “Ek ken jou soms”, “Kaapse draai”, “Kyk hoe lyk ons nou” en “Trein na Margate” opgeneem.

Hofmeyr is sedert 1986 in die Suid-Afrikaanse musiekbedryf, waar hy 30 CD’s in Afrikaans en Engels sedert 1989 uitgereik en in tien rolprente gespeel het. Hy het al meer as 200 Afrikaanse liedjies, waaronder vir homself en verskeie ander kunstenaars, geskryf en opgeneem, tien boeke gepubliseer, in verskeie dramaproduksies en sepies soos Agter elke man, Egoli en 7de Laan opgetree.