Lugmaglede dors, warm in hoofgebou

Lugverkoeling (Foto: Pixabay)

Lede van die Suid-Afrikaanse Lugmag moet glo hul werk in onuithoudbare toestande verrig, aangesien die hoofkantoor in Pretoria nou al etlike maande sonder water, lugverkoeling en werkende hysbakke is.

Volgens die Suid-Afrikaanse Nasionale Weermagunie (Sanwu) moet werkers soms in temperature van tot 34 °C werk, aangesien die gebou se lugverkoelingstelsel vir die afgelope twee weke reeds buite werking is. Die hysbakke sowel as die roltrappe is jare lank al stukkend en daar is boonop geen deurlopende toevoer van lopende water na die gebou nie.

Volgens JG Greeff, die nasionale sekretaris van Sanwu, is hulle uiters ontevrede met die toestande waaronder hul lede moet werk. Hy sê die meeste personeellede word daagliks teen etenstyd huis toe gestuur.

“Die SA Lugmag is veronderstel om ’n professionele instelling te wees wat in ’n professionele omgewing behoort te funksioneer. Daar kan nie van professionele persone verwag word om onder sulke ondraaglike omstandighede te werk nie.”

Volgens hom is hul lede deur hul seniors ingelig dat daar ’n gebrek aan fondse is om die nodige herstelwerk te doen.

Sanwu is tans besig om met die topbestuur van die Suid-Afrikaanse Nasionale Weermag (SANW) te vergader oor die herstel van die fasiliteite.

“Sou die vakbond se pogings in hierdie verband nie die gewenste resultaat oplewer nie, sal ons nie huiwer om regstappe op ’n dringende basis te doen nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

32 Kommentare

jongste oudste gewildste
Twallie

Ja nee. Daar is nie meer woorde nie.

Suzette

Maar weereens net ‘n bewys van die verval van die land onder die regerende party – geen salf te smeer nie. Hoe stukkender hoe beter…..

mattk

Die kaders glo mos nie in instandhouding nie…. kyk maar die verval van alle staatsgeboue en instellings.

Wielspore

‘n Weermag se bestaan is sy infrastruktuur, geboue en toerusting en dan ook sy lede. Klompie jare terug gedurende my tyd in die weermag was dit alles in tip top kondisie. Die ANC regering faal met die weermag.

Kokerboom

In nuwe bestel is almal bestuurders en niemand aanvaar aanspreeklikheid. Hul “worry” net nie want dis werk