Luiperdaanval: Gids het nie fouteer nie

SANParke het Donderdag na afloop van ʼn ondersoek gesê die veldgids wat vroeër vandeesmaand deur ʼn luiperd in die Krugerwildtuin aangeval is, het nie verkeerd opgetree nie.

Glenn Phillips, die wildtuin se bestuurshoof, het Donderdag tydens ʼn mediakonferensie gesê SANParke het ʼn deeglike ondersoek gedoen na die voorval op 2 Julie toe ʼn luiperd ʼn veldgids tydens ʼn wildrit in ʼn oop safari-voertuig aangeval het. Die voorval het buite die Skukuza-ruskamp op die pad na Onder-Sabie plaasgevind.

“Dit is baie jammer dat die voorval plaasgevind het in die teenwoordigheid van gaste en dat die luiperd van kant gemaak moes word.” Phillips het oor die risiko van oop safari-voertuie gesê nagenoeg 1,5 miljoen gaste het die afgelope 15 jaar die park in hierdie soort voertuie binnegekom. Volgens Phillips kom dit neer op 262 persone in 41 voertuie in die wildtuin per dag en daar was, behalwe vir dié voorval, nog net een ander voorval.

Phillips het gesê die nadoodse ondersoek van die luiperd het gewys dat die dier se tande in ‘n baie slegte toestand was, haar maag was leeg en haar galblaas geswel. Die dier was ook vol parasiete en het tuberkulose gehad.

Volgens Phillips het die ondersoek verder gefokus op bewerings dat die veldgids die luiperd geteister en “ingeboks” het met die voertuig. “Daar is spesifiek daarop gefokus tydens die ondersoek, met oorweging aan ooggetuieverslae, asook grafiese sketse van die gids en videobewyse.”

Phillips het gesê daar is vasgestel dat die gids nie verkeerd opgetree het nie en dat die luiperd in ‘n slegte toestand was.