LUR woedend oor syfers weens ‘mediese nalatigheid’

(Foto: Daan Stevens/Unsplash.com)

Die LUR vir gesondheid in Gauteng, Bandile Masuku, het Woensdag woedend gereageer op DA-lid Jack Bloom se verklaring dat altesaam 3 832 pasiënte verlede jaar in Gautengse staatshospitale dood is weens 10 741 sogenaamde voorvalle van ernstige teëspoed (SAE).

Maroela Media het vroeër berig volgens Bloom is dit voorvalle wat meestal uit “voorkombare mediese nalatigheid gespruit het”.

Kwara Kekana, Masuku se woordvoerder, sê Bloom vertel leuens.

“Die verklaring [deur Bloom aan die media] waarin gesê word dat SAE’s in hospitale op mediese nalatigheid neerkom, is feitelik verkeerd. Dit is onwaar en onverantwoordelik,” het Kekana gesê.

“Voorvalle van ernstige teëspoed is nié noodwendig mediese nalatigheid nie. Mediese nalatigheid moet bewys word.”

Sy het gesê in die laaste boekjaar het die Gautengse gesondheidsdepartement meer as 21 miljoen pasiënte behandel. Uit dié behandelings is 0,057% SAE’s aangemeld.

“In die eerste kwartaal van die huidige boekjaar [1 April tot 30 Junie] is meer as 1,6 miljoen pasiënte in Gautengse gesondheidsorgsentrums gesien en 0,0016% van die behandelings het gelei tot voorvalle van ernstige teëspoed,” het Kekana gesê.

Sulke voorvalle word binne 24 uur aangemeld, dadelik ondersoek en dan aan die spesifieke instelling se komitee vir pasiëntveiligheid oorhandig. Die saak word dan, afhangend van die erns van die saak, op kliniese hersiening geneem. “Dit word gedoen om swak plekke in pasiëntsorg te identifiseer en ʼn plan vir gehalteverbetering saam te stel.”

Sogenaamde voorvalle van ernstige teëspoed (SAE) word beskryf as voorvalle waartydens onbedoelde skade aan ʼn pasiënt berokken word weens iets wat gedoen is, of nié vir ʼn pasiënt gedoen is nie, eerder as weens ʼn siekte of onderliggende mediese toestand van ʼn pasiënt.

Kekana voer aan ʼn pasiënt se allergiese reaksie, afhangend van hoe ernstig dit is, kan in ʼn hospitaal as ʼn SAE beskou word.

Masuku het die sterftesyfers verskaf in antwoord op ʼn geskrewe vraag van Bloom, ʼn DA-lid van die Gautengse wetgewer. Luidens die syfers is die meeste van dié voorvalle – altesaam 1 763 – in die Chris Hani Baragwanath-hospitaal in Soweto aangemeld.

Dié hospitaal word gevolg deur die Steve Biko- akademiese hospitaal (893 sterftes) en die George Mukhari-hospitaal (766 sterftes). Albei is in die Tshwane-metrogebied.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
VanAfrika

Ek stem saam met Jack Bloom. Die Bertha Gxawa het deur nalatigheid my ma laat sterf. Ek het haar per ambulans na hierdie hospitaal gejaag na sy haar eerste aanval by die huis gekry het. Toe ons by ongevalle aankomhet die dokter gesien sy het dringend hulp nodig. Die suster sê my ma kan wag. Ek sê vir hulle my ma is n ongeval,dagtotdag patiente moet bietjie wag terwyl julle my ma die nodige medikasie moet gee om nog n bloedklont te verhoed. Die suster sê vir my dink ek dat my ma so belangrik is dat ander patiente vir… Lees meer »

JohanR

Aggggghhhhh shame die LUR is woedend. My hart pomp vla vir jou minister. Kom dan met jou eie syfers, maar ons almal weet dit sal nie gebeure nie.

Verstaan nie

As ek kyk na hoeveel die medise eise teen die staat is, soos wat Tito sopas gesê het, verstaan ek nie hoekom die antie so kwaad is en hoekom sy dit wil minder laat lyk nie. Sy maak nie sense nie.

Hanna Hoekom

Nou hoekom dink die spul narre die NGV sal suksesvol wees? Kyk wat gebeur deesdae in die staatshospitale. Skrik wakker!

George in Bloem.

Ja die waarheid is nogal geneig om seer te maak Mnr Onbevoegde “minister”. Julle onbevoegdheid kos menselewens. Skandalige nuttelose spul.