Lyke ure langs pad gelos omdat patologiewerkers staak

(Argieffoto)

Die DA in die Oos-Kaap het uitgevaar teen stakende werkers by die provinsie se patologie-afdeling. Die party sê diegene wat ná ʼn ongeluk op die toneel dood verklaar word, word sedert verlede Vrydag ure lank bloot langs die pad gelos weens die staking.

Jane Cowley, ʼn DA-lid van die provinsiale wetgewer, het gesê werkers staak weens onbetaalde oortyd en bystandtoelae.

“Dat die waardigheid van mense wat só tragies gesterf het en die lyding van hul families nou ʼn onderhandelingswapen in ʼn loongeskil geword het, is laakbaar,” het Cowley gesê.

Volgens die stakende werkers word oortyd- en bystandtoelae sedert April vanjaar nie betaal nie, ondanks beloftes wat die hoof van die departement daaroor gemaak het.

“Die departement is gedwing om met private begrafnisondernemers te onderhandel om die liggame op ongelukstonele te gaan haal terwyl die staking voortduur. Dit lei tot beduidende vertragings om ontbindende lyke op te laai,” het Cowley gesê.

“Dit is ʼn teken van ʼn verslegtende gesondheidsorgstelsel wat sy doelwit, om gesondheidsdienste aan inwoners van die provinsie te verskaf, uit die oog verloor het. Pleks daarvan is daar ooglopende wanbestuur wat gelei het tot ʼn menigte mediese regseise, wanbestuur van personeel, wanbestuur van geld en die indiensneming van onbevoegde kaders.

“Die gevolg is ʼn departement wat nie in staat is om homself reg te ruk nie.”

Cowley het gesê sy het reeds aan die LUR vir gesondheid in die provinsie, Sindiswa Gomba, geskryf om te vra dat die oortydkwessie as ʼn saak van dringendheid hanteer word sodat forensiese patologiedienste hervat kan word voor nóg belastinggeld gemors word.

Sy het gesê gesondheidsdienste moet gerespekteer en behandel word met die waardigheid wat dit verdien.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

18 Kommentare

jongste oudste gewildste
Outoppie

Hulle voel niks vir ń lewendige persoon hoekom sal hul nou hulself bekommer oor ń lyk

wielie

Sies! Skaam julle! Alles om geld draai ….

ryan

Haai nee!!Pateties!

JohanR

Sterf, of kom sterf in Suid Afrika. Die ANC is die regering. Ons wens hulle was nie!

Dries Bý

Geen etiek vir hul werk nie geld is vir hulle als .As jy nie respek het vir n ander se lewe nie wat nog te se vir n mens se lyk.Wat is jou eed.