Lymen vul nou éérs slaggate

Lymen besig om 'n slaggat te vul. Foto: Verskaf

Lymen besig om ‘n slaggat te vul. Foto: Verskaf

Lymen Malambo, die 25-jarige hawe- en werklose man van Hartbeespoort in Noordwes wat op sy eie slaggate begin vul het, het opleiding ontvang en vul nou slaggate dat dit bars.

Maroela Media het vroeër berig Vanessa Courtenay, ʼn inwoner in die gebied,‎ het verby Malambo gery waar hy hurkend in die pad besig was om ʼn slaggat met sement te vul en besluit om stil te hou. Malambo het vertel hy vul self slaggate en koop sakkies sement met die geld wat verbygaande motoriste vir hom gee. Courtenay het ʼn foto van hom geneem en dit op Facebook geplaas.

Volgens Courtenay het Malambo met opleiding begin en reeds sy eerste groot slaggat herstel. Sy het gesê hy sal volgende week verdere opleiding ontvang, waarna hy gesertifiseer sal word om slaggate te vul. Die maatskappy wat die opleiding doen het, het ook 12 25kg-sakke asfalt en ʼn 20 liter drom seëlaar aan hom geskenk. Volgens Courtenay het nog ‘n plaaslike maatskappy ook aangedui dat hulle moontlik bykomende toerusting sal verskaf.

“Lymen het in die harte van Suid-Afrikaners gekruip omdat hy gewillig was om sy eie werk te skep. Ek glo in my hart dat Lymen nog baie suksesvol gaan wees. Hy het ‘n can do-houding en niks is vir hom te veel nie.”

Courtenay het gesê Malambo het nog nie amptelik ʼn blyplek gekry nie, maar dit is ook in die vooruitsig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

14 Kommentare

jongste oudste gewildste
Vliegie

Wanneer ek sulke berigte lees flikker die vlam van hoop weer op vir ons mooi land! As almal maar net hierdie mentaliteit sal hê en nie net bak hand terugsit en verwag alles moet net vir hul gegee word nie! Well done Lymen wens daar was meer soos jy!

Anre

Well done Lymen wys die ander wat gedoen kan word. Die man wil ten minste werk!!!!

Dee

Daai’sie ‘n slaggat nie… dit is ‘n swembad!

Jan Meyntjes

Dit is natuurlik teen die plaaslike regering wet vir enige persoon om sonder magtiging aan enige Raads eiendom te werk maar, ek sê, “Stuff it” Lymen, gaan aan met die goeie werk en ek hoop die eienaars van eiendomme in daai area dra mildelik by om die man te help om julle ook te help. Miskien ‘n ou ongebruikte Wendy huis om sy tools in te bêre, ‘n kruiwa en ‘n geborgte selfoon mag miskien al help en moontlik ‘n drie wiel fiets .

MOOI

Ag dis mos nou ‘n goedvoel-storie wat ek baie graag op ‘n Vrydag wil lees. Mooi so Lymen!!! Hou so aan!!!!