Ma eis groot bedrag ná onnie kind klap

‘n Skermskoot uit die video. (Video: Twitter)

Die ma van die oudleerling van die Sans Souci Girls’ High School in Kaapstad wat glo deur ʼn onderwyseres geklap is, eis nou skadevergoeding van R150 000.

William Booth, die onderwyseres se regsverteenwoordiger, het gesê die eis is by die gelykheidshof in Wynberg ingedien. Volgens Booth voer die leerder se ma aan dat haar dogter “aangerand” is omdat sy aan ʼn ander rassegroep behoort en ʼn ander kultuuragtergrond het.

“Ons kantoor het opponerende stukke namens ons kliënt ingedien wat beswaar maak hierteen aangesien die voorval duidelik nie die gevolg was van ons kliënt was rassisties of diskriminerend op grond van kultuur was nie.”

Volgens Booth is die eis niks anders nie as ’n poging om finansieel voordeel te trek uit ’n voorval wat in werklikheid aangewakker is deur die leerder se “gebrek aan dissipline, oproerige en uiters uitdagende gedrag”.

Die onderwyseres is intussen oorweldig deur die ondersteuning wat sy van haar leerders, kollegas en lede van die publiek gekry het, aldus Booth.

‘n Skermskoot uit die video. (Video: Twitter)

Die Wes-Kaapse onderwysdepartement het vroeër bevestig die onderwyseres sal met die aanvang van die tweede kwartaal weer op haar pos wees.

Jessica Shelver, woordvoerder van die Wes-Kaapse onderwysdepartement, het gesê die skool se beheerliggaam het na afloop van ʼn dissiplinêre proses besluit dat die onderwyseres ʼn boete en finale waarskuwing en behandeling vir woedebeheer sal ontvang.

Die leerling wat glo geklap is, se ouers het haar intussen uit die skool gehaal, het Shelver bevestig.

Maroela Media het vroeër berig ʼn video van die onderonsie tussen die leerder en die onderwyseres is wyd op sosiale media versprei. Op die video kan gesien word hoe die twee in ʼn woordewisseling betrokke is, klaarblyklik oor ʼn selfoon en die taal wat die leerder in die klas gepraat het.

In ʼn stadium stamp die leerder die onderwyseres met haar tafel en probeer skynbaar haar selfoon teruggryp, waarna die onderwyseres haar ʼn oorveeg gee.

Dit is aanvanklik deur sommige op sosiale media beweer dat die voorval rasgedrewe was, maar leerders by die skool het dit eens dat die voorval niks met ras te doen het nie.

Die leerling se ma het vroeër ʼn klag van aanranding by die polisie aanhangig gemaak, terwyl die onderwyseres ook glo ʼn klag teen die leerder by die polisie ingedien het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

58 Kommentare

jongste oudste gewildste
Sê Net....

Die hele rasse storie raak nou afgesaag.

Leer vir jou kind maniere en respek vir mense ouer as hulle dan sal dinge soveel beter gaan.

Johan

Reg of verkeerd… Ek het tonne simpatie vir die onnie wie se gesag deur ‘n astrante leerder ondermyn is . Dit was ‘n teenreaksie teen die leerder se skandalige gedrag…

Elna

Ek mag dit seker nie se nie want ek het nie bewysse hiervoor nie maar hoekom kom dit vir my voor dat die ma die kind aangehits het om skoor te soek met die onnie sodat die onnie tot so gewelddadige stap moet gaan sodat die ma kan geld eis van die onnie af??? As ek n regter was het ek die eis se mier van die hand gewys want die ma soek nou net geld wat ek persoonlik hoop sy nie gaan kry nie want sy moes haar kind maniere geleer het deur die onnie respekteer het. Net my… Lees meer »

Wessel

Aha, die ekonomie knyp! My roep sal eerder wees dat die beskuldige, as sy skuldig bevind word, vir ‘n paar dae korrektiewe toesig gaan, maar dat daar geen geldelike betaling aan die eiser gemaak word nie.

AmY

Die ma moet daai geld maar wegsit. Sy gaan dit eendag nodig kry wanneer sy borgtog vir daai bedorwe brokkie moet betaal.