ʼn Vrou wat haar seun met ʼn kussing versmoor en daarna sy liggaam aan die brand gesteek het uit weerwraak vir haar voormalige man, is Woensdag in die Johannesburgse hooggeregshof gevonnis.
The Star het Donderdag berig Maliepetsane Precious Mokoena is tot 18 jaar tronkstraf gevonnis. Sy is ook twee jaar tronkstraf opgelê vir opsetlike saakbeskadiging, en ses maande vir aanranding. Die vonnisse gaan gelyktydig uitgedien word.
Mokoena het op 13 Januarie 2013 haar agtjarige seun, Lehlohonolo Magatikele, versmoor terwyl hy geslaap het. Sy het daarna sy liggaam in haar voertuig gesit, na ʼn nabygeleë woonbuurt gery, en sy liggaam langs die pad aan die brand gesteek.
“Hy het rustig in sy bed geslaap toe sy ma hom vermoor het,” het regter Ndawoyakhe Tshabalala tydens die vonnisoplegging gesê. “Sy is gedryf deur weerwraak en wou haar voormalige man en sy nuwe vrou verhoed om ʼn verhouding met die seun te bou. Sy lewe het gewelddadig tot ʼn einde gekom.
“Ek kan myself nie indink hoe sy liggaam onder die kussing moes geruk toe hy na asem gesnak het nie. Niks kan Mokoena se optrede regverdig of verskoon nie,” het Tshabalala bygevoeg. – SAPA
WOW 18 jaar vir die moord op haar kind wat n grap ! ! !
En sy kry net 18 jaar en nie die doodstraf nie? Pateties van ons regstelsel!!
Snaaks sy nie verwys is vir Sielkundige waarneming nie ….. dis mos die nuutste