Ma hoor in hospitaalbed van seun (4) se ongeluk

Dandré Esterhuizen in die hospitaal. (Foto: Verskaf)

Renette Esterhuizen, ʼn ma van Bela-Bela in Limpopo, het nog Saterdagoggend in ʼn hospitaalbed gelê waar sy vir swangerskapkomplikasies behandel is toe sy die oproep ontvang – haar vierjarige seuntjie was in ʼn ernstige motorongeluk betrokke.

Sy het haarself onmiddellik ontslaan om by klein Dandré se hospitaalbed te kom – haar eie behandeling sou moes wag.

“Ek het myself ontslaan, want ek moes net by my seuntjie wees. Die dokters het darem vir my medikasie gegee en net gesê as daar probleme is, moet ek net vinnig by die naaste hospitaal uitkom,” sê sy.

Esterhuizen vertel sy is nou sewe maande swanger en is Vrydag in die hospitaal opgeneem. ʼn Vriendin van haar het na Dandré gekyk terwyl sy in die hospitaal is. Die vriendin het Dandré saamgeneem toe sy Vrydagaand by mense gaan braai het.

Die wrak van die voertuig na die ongeluk. (Foto: Verskaf)

Op pad terug was hulle egter in ʼn ernstige motorongeluk betrokke toe die voertuig gerol het. Dandré is uit die voertuig geslinger. Die ander twee mense in die voertuig het matige beserings opgedoen.

“Ek het eers vroeg die Saterdagoggend gehoor my kind was in ʼn ongeluk, so ek was nie self op die ongelukstoneel nie. Hy was toe reeds in die hospitaal in Bela-Bela opgeneem. Hy kon egter nie daar die behandeling kry wat hy nodig het nie en ons het besluit om hom na die Sunshine-hospitaal in Benoni te laat oorplaas.”

Dandré is gisteraand per ambulans na die hospitaal gebring en is vanmiddag teater toe om geopereer te word. Esterhuizen verduidelik dat hy talle snymerke aan sy gesig en kop opgedoen het, asook ʼn groot wond oor sy voorkop. Dié wond sal tydens die operasie geheg word.

Dandré voor die ongeluk. (Foto: Verskaf)

“Dandré moet ook nog ʼn skandering ondergaan om te bepaal of hy enige breinskade opgedoen het. Daar is swelling in sy gesig en om sy oë, asook braking wat moontlik aanduidings van breinskade kan wees. Maar tot die skandering gedoen is, weet ons nie hoe ernstig sy beserings is nie,” sê sy.

Sy verduidelik Dandré word meestal onder verdowing gehou aangesien hy erge pyn ervaar as hy wakker is.

Dit is in dié stadium onmoontlik om te voorspel hoe lank Dandré in die hospitaal behandel sal moet word. “Ek fokus nou eers net op die operasie en die skandering. Daarna sal ons hoor wat die pad vorentoe is,” sê Esterhuizen.

“Maar ek weet daar lê nog ʼn lang herstelpad voor.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

35 Kommentare

jongste oudste gewildste
Yankee

Uiters pynlik om die klas van berig te lees. En geen vraag diekant, net n stille gebed vir die seun, en dan ook n dankie dat so n tragedie ons beskore is.

Keith

Uitgeslinger selfs al was hy in n kinderstoel en vasgegordel? Of was hy nie?

Ria Maritz

Liewe ouers. My trane loop vir julle en jul kindjie.
Ons dien ‘n Almagtige God. My Gebede gaan uit vir julle almal. ?. Sterkte ook in die teater.

Hartseer

Dis baie hartseer. Hoop mamma, baba en grootseun sal almal ok wees. Is daar nie ‘n pappa in die prentjie nie, vir hom of baba, wat na hom kon omsien nie?

Wielspore

Sterkte aan die ouers van Dandré, dit is nie aangenaam om langs die bed te staan van jou kind wat seergekry het. Ons hoop julle seun herstel spoedig!