Ma pleit vir geregtigheid ná ongeluk gesin eis

Van links: Clive, Leané, Aiden en Claudia (Foto: Verskaf)

“Ek soek geregtigheid vir my kinders se dood.”

Só sê ʼn getraumatiseerde Belinda Tenreiro nadat ʼn ongeluk die lewe van haar dogter, skoonseun en twee kleinkinders geëis het.

Sy het intussen ’n private speurder aangestel om die ongeluk te ondersoek en eis dat die bestuurder van die ander voertuig wat volgens haar, haar dogter, Claudia Janse van Rensburg (25), skoonseun, Clive, en kleinkinders, Aiden (4) en Leané (5), se dood veroorsaak het, aanspreeklikheid daarvoor aanvaar.

Tenreiro het die ongeluk voor haar sien gebeur. Sy sê dit speel “soos ’n ou langspeelplaat herhaaldelik in haar kop af”. Sy kan boonop selfs die kleinste detail van die noodlottige voorval presies onthou.

Die Janse van Rensburg-gesin was Donderdag van Boksburg op pad na Richardsbaai om by familie te gaan kuier. Die gesin het in ’n Renault Clio tot in Kriel in Mpumalanga gery en vandaar agter Tenreiro en haar man, Pedro, se Ford Ranger-bakkie gery.

Tenreiro-hulle het terselfdertyd ’n Jeep met hul bakkie gesleep.

“Op die N2, onderweg na Richardsbaai, het ons reeds op drie ongelukke op die pad afgekom. Die pad was baie besig. Ons het nie gedink dat ons die vierde ongeluk sou wees nie.”

Omstreeks 21:30, sowat 131 km buite Richardsbaai, het daar skielik ligte reg van voor op die Tenreiro’s afgekom. Sy sê dit het gelyk of die voertuig, ’n Land Cruiser, in die aankomende verkeer se baan ry.

“My man het geskree dat die motor met ’n hengse spoed in ons baan inbeweeg. Hy het probeer padgee deur geleidelik na die geel streep oor te gaan. Die Land Cruiser het teen ons bakkie se kant geskuur en die Jeep van voor getref.

“Ons vermoed Clive-hulle het gesien daar is moeilikheid en hulle het ook van die pad probeer aftrek, maar ongelukkig het die Land Cruiser van voor teen hulle gebots.”

Tenreiro vertel sy het ná die slag uit die bakkie gespring en op die teerpad geval.

“Deur die stukkende glas en chaos het ek na die Clio begin soek. Ek het dit nêrens gesien nie. Ek het eers na die veld aan die aankomende baan se kant gekyk, maar niks gesien nie. Toe ek omdraai, het ek die opgefrommelde Clio gesien. Dit was iets verskrikliks.

“Ek het gegil en geskreeu. Ek het na die kar gehardloop en geruk. Ek het gehoop iemand daarbinne hoor my en reageer, maar daar was geen beweging nie.”

Al vier lede van die Janse van Rensburg-gesin is op slag dood.

Volgens Tenreiro was die ongelukstoneel ongeveer 150 m lank van die plek waar die voertuig hul bakkie getref het, tot waar dit teen die Clio gebots het. Een van die Land Cruiser se bande het sowat 30 m van die ongelukstoneel gelê.

Volgens Tenreiro het die Land Cruiser ook gerol.

“Twee mans het die bestuurder uit die Land Cruiser gehelp en hy het die ongelukstoneel verlaat. Ons weet nie waarheen hy is nie.”

Tenreiro sê dit is vir haar skokkend dat die bestuurder net so die ongelukstoneel verlaat het. Sy het ’n private speurder aangestel om ondersoek in te stel en antwoorde te kry. Sy sê ook sy sal nie sal rus tot geregtigheid geskied nie.

Kapt. Nqobile Gwala, polisiewoordvoerder, het aan Maroela Media bevestig dat die Mkhuze-polisie ’n saak van strafbare manslag teen die bestuurder van die Land Cruiser ondersoek. Sy het bevestig dat dié man na die ongeluk na die hospitaal geneem is.

“Die omstandighede rakende die ongeluk word ondersoek,” sê Gwala.

Tenreiro beskryf Clive en Claudia as die liefdevolste mense denkbaar.

“Ek sal Tafelberg sonder enige klimtoerusting vir hulle uitgeklim het. Hulle was net die beste mense wat daar was.”

Clive het as elektrisiën in Boksburg gewerk en Claudia was ʼn tuisteskepper. Die gesin was van plan om na Nieu-Seeland te emigreer, maar hul planne is weens die Covid-19-pandemie in die wiele gery.

Die gesin se begrafnis vind Vrydag plaas.

• Die berig is gewysig na dit aanvanklik gepubliseer is. – RED