Ma se pleidooi: ‘Help, ek vrees vir my baba se lewe’

Mia (Foto: Facebook)

ʼn Jong ma van Polokwane vrees vir die lewe van haar dae oue babadogtertjie nadat sy vroeër vandeesmaand te vroeg in die Mankweng-hospitaal gebore is.

Amor Schoeman, woordvoerder van die Child Medi Organisasie wat ouers met mediese hulp bystaan, sê die ma, wat anoniem wil bly, het in ʼn brief aan die organisasie gesê sy is erg getraumatiseerd nadat sy op 7 Mei in vroeë kraam gegaan het.

Volgens die brief is sy vanaf die Polokwane Provinsiale Hospitaal na Mankweng vervoer nadat dié hospitaal nie die beskikbare toerusting vir ʼn bevalling gehad het nie.

Met haar aankoms by Mankweng is sy egter ook ingelig dat daar nie ʼn beskikbare bed of ʼn dokter is wat haar kan ondersoek nie.

“Sy het op ʼn houtbankie gaan sit en deurentyd om hulp gesmeek,” sê Schoeman. “Sy is elke keer toegesnou en vertel sy is ʼn drama queen en dat sy moet wag tot die dokter aan diens kom.”

Die ma van die baba het glo later die aand, ná ʼn lang wagperiode, begin kraam. “Toe kry die ontvangspersoneel ʼn rolstoel en sê vir haar sy kan kraamsaal toe gaan. Voor die ma kon sit, is die baba gebore. Sy moes die baba self vang, en die babadogtertjie het amper die grond getref,” lui die brief aan die Child Medi-organisasie.

Die baba, klein Mia, het 900 g geweeg en is na die neonatale eenheid geneem. Die ma het aanvanklik geen inligting oor haar baba gekry nie.

Volgens die ma het dokters haar vandeesweek ingelig dat klein Mia gereed is om na die algemene eenheid oorgeskuif te word, maar nou vrees sy vir haar kind se lewe.

“Daar word nie na die babas gekyk nie, en talle kinders het al daar gesterf,” beweer die ma in die brief.

Mia se ma woon glo in ʼn vertrek in die hospitaal saam met sowat 34 ander vroue sodat sy na haar dogtertjie kan omsien. Volgens die Child Medi Organisasie is daar geen lopende water in dié plek nie.

Mia (Foto: Facebook)

Schoeman sê buiten dié bekommernis, moet Mia ook ʼn operasie op haar been ondergaan nadat sy seergekry het toe haar ma haar gevang het. Mia se been het vermoedelik aan die rolstoel vasgehaak en seergekry, maar niemand kan bevestig hoe sy seergekry het nie.

Die ma wil nou haar kind na ’n privaat-hospitaal laat verplaas.

’n Private hospitaal het die ma aanvanklik ʼn deposito van R150 000 gevra om na die kind om te sien, maar het hulle intussen tegemoet probeer kom met R50 000 se afslag.

Die Child Medi Organisasie en die ma is nou dringend op soek na weldoeners wat die ma kan bystaan om haar dogtertjie na die Mediclinic-hospitaal oor te plaas.

Die hospitaal het navrae oor die bewerings na die departement van gesondheid verwys. Thabiso Teffo, woordvoerder van die departement, het onderneem om skriftelik te reageer op die bewerings ná ʼn interne ondersoek van stapel gestuur is.

ʼn Trust is intussen geopen vir diegene wat bydraes wil maak. Klik hier vir meer besonderhede oor die trust.

Besoek die Child Medi-organisasie se Facebook-blad vir meer inligting.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

56 Kommentare

jongste oudste gewildste
m

Hierdie staatshospitale se onbekwaamheid maak mens bang. Dis onaanvaarbaar.

Mia

Goeie dag MM, kan julle moontlik die besonderhede van die trust publiseer vir diegene wat nie toegang tot facebook het nie?

Helen

Ek gaan help met n R100 jmr maar dis al wat ek nou het hoop daai kleintjie word gehelp!!!
Dis n skande dat die Staatshospitale in so n toestant is? Die armes word sleg behandel in die land!!~

Mel

Medies is so belangrik :-(
My hart gaan uit na hierdie klein mensie!

Johann

En dis die standaarde wat die ANC op almal wil afdwing met hulle Nasionale Gesondheidsplan? Welkom in die huidige SA, nevermind die “nuwe SA”. Afdraande pad al die pad vorentoe.