Ma vertel oor seun (4) se ‘terugkeer uit die dood’

Klein Myburgh Roux het wonderbaarlik geen skade oorgehou van die beproewing wat hy deur is nie. (Foto: Verskaf)

Met sy ondeunde glimlag en sprankelende ogies lyk Myburgh Roux (4) soos enige ander kleuter.

ʼn Mens sou nie kon dink dit is minder as drie maande gelede dat sy ma sy lewelose lyfie uit ʼn swembad getrek het waar hy langer as vyf minute onder water was nie.

Met potblou lippe, hande en voete, ʼn geswelde gesiggie en geen teken van asemhaling nie, het dit gelyk asof die Roux-ouerpaar se ergste nagmerrie waar geword het. Maar toe kom die wonderwerke.

“Myburgh se storie is een van hoop, dit is een van geloof en dit is een wat vertel van God, die enigste waarmaker en wonderwerker,” sê Marzanne Roux, Myburgh se ma, aan Maroela Media. “Dit is hoekom ek vandag Myburgh se storie vertel, omdat ek hierdeur kan getuig hoe groot ons God is. Alle eer en lof kom net Hom toe.”

Marzanne onthou die gebeure op 13 Mei vanjaar so duidelik asof dit gister gebeur het. Sy het saam met haar twee kinders vanaf die plaas buite Witbank in Mpumalanga, waar haar man, Tielman, boer, gery om vir Lila (6) na haar balletklas op die dorp te neem. By die balletskool het Marzanne gou Lila se balletklere aangetrek, terwyl Myburgh en ʼn maatjie ʼn entjie verder weg gespeel het.

Die grasgroen swembad waarin Myburgh beland het. (Foto: Verskaf)

Sy vertel dit was tussen vyf en sewe minute nadat hulle by die balletskool aangekom het dat sy besef het Myburgh is nie meer naby haar nie. Sy het dadelik na hom begin soek en sy maatjie gesien wat by ʼn hekkie staan wat lei na ʼn ander erf. Dié erf is omring met ʼn hoë muur met doringdraad bo-op en die hekkie in die muur is gesluit.

“Ek het die maatjie gevra, ‘Waar is Myburgh?’, en hy het met sy vingertjie na ʼn swembad gewys aan die ander kant van die muur,” vertel Marzanne. Sy het onmiddellik besef wat gebeur het. Onder deur die muur loop ʼn reënwatersloot deur ʼn gat wat sowat drie bakstene hoog is. Myburgh het deur dié sloot en die gat in die muur gekruip om aan die ander kant uit te kom.

Die swembad was ongebruik en grasgroen – byna ononderskeibaar van die gras om die swembad. In die water het Marzanne Myburgh se rooi hempie gewaar. Hy het met sy gesig na onder in die water gedryf naby die kant van die swembad.

Myburgh is in die hospitaal gekoppel aan ʼn masjien wat sy liggaam se temperatuur op 34 °C gehou het. (Foto: Verskaf)

“Al wat ek kon dink, is ek moet my kind uit die water kry. Mense het my later gevra hoe het ek geweet ek moet deur die sloot kruip en ek kan nie verduidelik hoe ek geweet het nie. Dit was die Heilige Gees, want ek het net onmiddellik deur daardie gat in die muur gekruip, na die water gehardloop en my kind uitgetrek,” vertel sy.

“Sy wange was klaar erg geswel en sy voete, hande en lippe was potblou. Ek het nog nooit voorheen in my lewe KPR gedoen nie, maar het sy neusie toegedruk, by sy mond ingeblaas en twee keer op sy bors gedruk. Daar het onmiddellik water uitgekom. Toe het ek begin skree vir hulp.”

Op daardie oomblik het ʼn pa van een van die kinders by die balletskool stilgehou om sy dogter te kom aflaai. Hy het Marzanne se beangste gille gehoor, nader gehardloop en oor die hekkie gespring om by Myburgh te kom. Dié man het toevallig net ʼn paar dae vantevore by ʼn nuwe werk begin waar hy noodhulpopleiding moes ontvang. Hy het onmiddellik die mond-tot-mond-asemhaling by Marzanne oorgeneem en nie opgehou totdat die paramedici opgedaag het nie.

Paramedici van Legacy Emergency Specialists het opgedaag en onmiddellik aan die werk gespring om Myburgh te red. Teen daardie tyd het die seuntjie weer begin asemhaal, maar hy was steeds bewusteloos en sy asemhaling was baie swak. Paramedici het sy liggaam onmiddellik afgekoel om breinswelling te voorkom en hom geïntubeer voordat hy na ʼn hospitaal in Witbank gehaas is. Van daar is hy na die Netcare Garden City-hospitaal in Johannesburg oorgeplaas.

‘Ek moes leer om op water te loop’

Daar in dié hospitaal se pediatriese waakeenheid het die emosionele stryd begin om Myburgh se lewe te red. Die seuntjie is in ʼn geïnduseerde koma geplaas en gekoppel aan ʼn masjien wat sy liggaam se temperatuur op 34 °C gehou het. Deur sy liggaamstemperatuur so laag te hou, is die kanse verminder dat die kleuter se brein sou swel.

“Die dokters kon glad nie vir ons sê of Myburgh enige breinskade opgedoen het nie. Dít sou ons eers kon weet wanneer hy wakker is,” sê Marzanne.

‘n Emosionele oomblik toe mamma Marzanne vir die eerste keer weer haar seuntjie kan vashou sedert hy in die hospitaal opgeneem is. (Foto: Verskaf)

Toe hulle op dag ses vir Myburgh onder sedasie uitgebring en hom van die ventilator afgehaal het, het sy longe platgeval en dokters moes hom noodgedwonge weer sedeer en terug op die ventilator plaas. Daar is toe vasgestel dat Myburgh ʼn virale longontsteking opgedoen het, moontlik weens die bakterie in die vuil swembadwater.

“Dit was ʼn baie traumatiese dag,” sê Marzanne. “Die dokters het vir ons gesê daar is niks méér wat hulle vir ons kind kan doen nie. Hy was aan masjiene gekoppel wat hom sistematies ondersteun het. Al wat ons kon doen, was bid en hoop dat sy longe weer werk.”

Sowat ʼn week later is daar weer gepoog om Myburgh van die ventilator af te haal en by te bring. “Hulle het hom daardie dag omstreeks 13:00 wakker gemaak en gewone suurstof toegedien. Die aand om 19:00 het ek en my man gou iets gaan kry om te eet toe die dokter bel. Hy het gesê ons kind cope nie. Hy hiperventileer en kry só erg onttrekking van die medikasie wat hy heeltyd ontvang het dat sy lyfie ruk en daar skuim by sy mond uitkom. Hulle moes hom weer sedeer en terug op die ventilator plaas,” sê Marzanne.

Donderdag 30 Mei – op Hemelvaartdag – was dit die 17de dag sedert Myburgh in die swembad beland het. Marzanne vertel dat ʼn vriendin op dié dag vir haar ʼn boodskap gestuur het om te sê dat die nommer 17 in die Bybel algehele oorwinning en oorwinning van die vyand simboliseer.

Die eerste keer toe ousus Lila weer vir Myburgh kon sien sedert hy in die hospitaal opgeneem is. (Foto: Verskaf)

“Ek het met nuwe hoop daardie oggend hospitaal toe gegaan en gehoor hulle gaan hom weer vandag probeer wakker maak. Hulle het hom onder sedasie uitgebring en van die ventilator afgehaal … en hy het self asemgehaal. Dít was die dag dat die Here hom vir ons teruggee het.”

Marzanne sê sy glo dat Myburgh 17 dae aan die Here se voete gekuier het. “Ek glo dat die Here in hierdie tyd geheimenisse met hom gedeel het, wat hy weer later met ons sal deel. En toe het die Here hom vir ons teruggegee.”

Myburgh was wakker, maar kon glad nie praat nie. Sy oë was glaserig, sy handjies was slap, hy het net in die verte gestaar en sy lyfie was stram. Dokters het nie geweet of hy breinskade het en of dit slegs die uitwerking van die medikasie is wat dit veroorsaak het nie.

“Ek moes daar leer om geestelik op water te loop. Ek moes net kies om te glo in iets wat nie bestaan nie, kies om te glo dat my kind 100% genees sal word, al was daar geen konkrete bewyse dat dit sou gebeur nie,” sê Marzanne.

Presies 21 dae ná die ongeluk is die ouerpaar huis toe met ʼn kleuterseuntjie wat steeds nie kon praat nie, slegs sagte kos kon eet en meestal net voor hom uitgestaar het.

Vier dae nadat hulle by die huis gekom het, het Marzanne wakker geword met Myburgh wat in ʼn hees stemmetjie vir haar fluister: “Mamma, kan ek bietjie pappies kry?”

Marzanne en Tielman by Myburgh in die hospitaal. (Foto: Verskaf)

“Die trane het geloop van dankbaarheid,” sê Marzanne. “Van daardie dag af was hy weer sy ou self. Sy lyfie was swak – hy was net vel en been toe hy uit die hospitaal kom – maar hy was weer die kind wat ons geken het. Hy het naderhand vaste kos begin eet, ál beter begin praat en weer soos altyd gespeel.”

Myburgh was sedertdien by ʼn spelterapeut, ʼn arbeidsterapeut en ʼn fisioterapeut, wat almal bevestig het hy het wonderbaarlik geen fisieke, emosionele of verstandelike skade van die voorval oorgehou nie.

“Hy het geen vrees of angs vir water nie, en hy verstaan die dood, maar is nie bang vir die dood nie,” sê sy. “Hy doen wel fisioterapie om sy lyfie net weer sterk te kry, maar daar is geen langtermynskade nie.”

En ja, Myburgh onthou die gebeure by die swembad baie goed. “Hy het later vir my vertel hy wou loop op die ‘uneven grass’ toe hy ‘geflip en geval’ het. As jy hom vra wat het toe gebeur, sê hy: ‘Mamma, ek het gestruggle.’ Hy onthou die plek van die ‘uneven grass’.”

Die Roux-gesin se harte loop vandag oor van dankbaarheid. (Foto: Janie Opperman Photography)

By Marzanne is daar geen twyfel dat Myburgh se wonderbaarlike herstel te danke aan die wonderwerke van die Here is nie. “My kind was dood. Hy was dood toe ek hom uit daardie swembad gehaal het. En vandag sal jy dit nooit eens weet nie,” sê sy.

“Elke dag as ek vir hom kyk, loop my hart oor van dankbaarheid. As ek sy gesiggie sien, sien ek God se goedheid en guns in ʼn mens se lewe. Ek staan verstom oor sy goedheid en genade.”

En dít is die boodskap wat die Roux-gesin nou met die wêreld wil deel.

“Nou die dag ry ek en Myburgh om vir pappa koffie te vat waar hy in die landerye werk, en ons ry verby ʼn spruit op die plaas. Myburgh vra my, ‘Mamma, daardie plek is mos water, nè?’ Ja, sê ek, dit is water. En hy sê vir my: ‘Het Mamma geweet Jesus bly in die water? Hy bly in ons harte, maar hy bly ook in die water.’”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

84 Kommentare

Ilz ·

Prys die Heer. Dieselfde het met ons in 2008 gebeur. My dogtertjie was 21 maande oud. Vandag is sy 13 jaar gesond geen skade. Sy was ook ‘n rukkie in die hemel. Ek dank God hy het haar terug gegee.

Alle eer vir ons Koning ·

Koos jy sê wat ek in my hart voel! Hoe Amazing is Hy !!! ek wil net voor Sy voete neerval en Hom Loof vir Sy goedheid en liefde!

J ·

Loof en Prys die Here elke dag Hy is n waarmaker van sy woord. Amen

Essie ·

PrysGod ek het omtrent ook n soortgelyke voorval was net in n motorongeluk teen n trein vas en vir 3maande bewusteloos maar God is groot en het my weer opgehelp

Soltykat ·

Die Here is werklik goed en by Hom is niks onmoontlik nie

MARTIE MÜLLER ·

Geen mens kan een dag sonder om ONSE VADER te aanbid en Dankie te sê vir SY GROOT GENADE nie. PRYS SY NAAM.

Delani ·

GOD is Groot. Hy is die ENIGSTE ware en lewende God. Die God wat Hemel en aarde gemaak het. Prys God. Loof Hom!!!!! Amen

Alida X ·

Pragtige inspirerende verhaal.
Dankie ouers dat julle dit met ons deel en getuig.
As ons meer van Sy goedheid getuig sal ons dit meer glo en meer positief wees.

Dia ·

Wat kan mens se. Dankie Marzanne vir die wonderlike getuienis. Mag God met julle en klein Myburgh wees vir die res van julle lewens en mag Hy ons almal in Sy magtige Hande hou!

Gallie Vermeulen ·

Hoe groot is God se genade en liefde. Hoe kan daar nog mense wees wat nie glo nie. Baie dankie Here vir wat u vir hierdie gesin gedoen het. Ek is skoon aangedaan en voel so dankbaar dat ek in hierdie wonderwerk van die Almagtige kon deel. God is groot.

Michelle ·

Wat ‘n verhaal.
Soooo bly alles het goed geeindig.
Die Here is werklik goed vir ons.

Riekie Fleuriot ·

PRYS KONING JESUS!!!
Dit is so wonderlik om ñ kind van God te kan wees en te weet dat Hy daar is vir ons. Dankie Jesus vir volkome genesing vir klein Myburgh, ons loof en prys U daarvoor. Dankie ook aan die ouers dat julle die wonderwerk van God met ons gedeel het en geniet julle pragtige kindertjies.

Deloris ·

Hoe groot is ons God nie. Dis n riem onder my hart om sulke wonderwerke en getuienisse te Lees. Amen Prys die Heer????

$ ·

Dit is die kosbaarste getuienis deur mense van wie dit duidelik is dat julle God werklik ken, dankie! Aan God kom toe al die eer, lof en aanbidding! Aan Sy liefde is daar geen einde nie! Hy ís ons God van wonderwerke!

Wonder Woman ·

WOW!!!! AMEN!!!! Ons dien ‘n Groot en Lewende God….

Essie ·

Hul het my as dooie opgetel langs die treinspoor maar Hy het ander planne met my

maryann ·

Ons God is so groot en so magtig Dankie Jesus vir hierdie getuienis. Amen

Hein ·

Ja die Here is altyd goed, so dankbaar vir die wonderwerk in hulle lewens. Dis verseker baie opbouend om hierdie goeie nuus te lees!

Sandy ·

God se genade is groot. Baie bly vir die gesin dat hul seuntjie weer homself is.

Barno ·

My seuntjie is ook 4, en hy het presies dieselfde sweetpak as in die eerste swart en wit foto. Sulke verhale laat my vlak asem haal. Enige ouer se nagmerrie. Eks net dankbaar dat hierdie gesin met die Genade van Bo, uit die nagmerrie kon wakker word.

Mel ·

Stem saam almal se komentare!! Amen ! Jy is ‘n regte yster liewe Myburgh

Drikus Kotze ·

As jy nie in wonderwerke glo nie is jy die beklaenswaardigste van mense. Ek glo in Wonderbaar.

Marinda vd Merwe ·

Ek het basies ook dit oorgekom. Ek kan nie swem nie en het by die diepkant ingespring na my seun in die swembad val, sy koppie was besig om onder te gaan en toe ek my weer kom kry sit ek buite die swembad besig om water uit sy longe te druk. Waarlik dis die Heilige gees, want hoe ek hom uitgekry het en myself wat nie kan swem nie is ‘n wonderwerk!! Amen

Yvonne ·

Alle eer aan ons Hemelse Vader!!!! ‘n Tragiese storie met ‘n pragtige einde.

Nicci ·

Genade onbeskryflik groot ♡
Dankie dat julle so braaf is om julle storie te deel met die wêreld!
Die saadjies wat julle plant gaan n ongelooflike oes af gee !
Blessings, Liefde en Drukkies vir julle ♡

Annemie Coetzee ·

GOD IS GROOT!!!

My seun moes ook dood gewees het met geboorte, maar ek weet met my hele wese dat God sy lewe gered het met ‘n doel. Hy glo dit ook en leef sy getuienis. Hy swot onderwys deur Unisa nadat hy eers rugby gespeel het en oral getuig het van die goedheid van God. Hy wil ‘n verskil maak, al is dit net in een kind se lewe.

Hy getuig oral waar hy gaan dat God hom gespaar het vir groter dinge.

witogie ·

Die laaste paragraaf oor Jesus wat in die water bly het my werklik aangeraak. Dit gee my sommer hoendervleis.

Nadia ·

Ek wens julle almal kon hierdie wonderwerk eerstehands ervaar soos ons gedoen het.
Klein Myburgh is in my seuntjie se klassie by die skool en ek en Mamma Marzanne het saam grootgeword. Die gevoel om hierdie wonderwerk te beleef kan mens nie in woorde beskryf nie.
Ons het 2 weke terug vir hom ‘n groot partytjie gehou by die skool om hom terug te verwelkom. Dit was ‘n baie emosionele oomblik vir almal.
God is groot – Raise a Halleluja!!!

Duifie ·

Dankie vir die getuienis van hierdie wonderwerke wat God vir julle en jul seuntjie gedoen het. En Nadia, dankie vir die partytjie waar al die maatjies ook die verkonsiging van God se genade kon sien en hoor. Prys ons Lewende Almagtige Genadige God!!

Israel ·

Die storie is so mooi dit gee trane in my oë, Dankie Jesus ons kan op U vertrou en net op U !

Janie Opperman ·

Ek sal daai dag seker nooit vergeet nie. ‘N mamma se benoude gille, mens het dadelik geweet daar is groot fout toe ons dit hoor. Die kyk op ‘n mamma se gesig van vrees en angs en trane is genoeg om enige iemand te laat bid dat daai kleine lyfie net gered moet word. Marzanne, my liefste vriendin, ons almal juig saam julle en die wonderwerk wat God alleenlik verrig het! Hy het elkeen daai dag daar geplaas met ‘n doel! We Raise a Hallelujah! Baie lief vir julle en so bly om deel te kan wees van die amazing VICTORY!!

Martie ·

Loof en Prys ons ALMAGTIGE GOD en Hemelse VADER!! GOD is sóó groot, goed, genadig en getrou – Loof HOM!! ????

Johanna ·

Die Here is Groot. Sy Liefde Oneindig. Prys Hom almal wat asem het.

Blommie ·

Dis nou sowaar n mooi storie en ek is saam julle dankbaar en bly met die wete God is groot.

Jenny Ellis ·

Jul storie is een met n goeie uitkom. Prys di Here. As ek di seuntjie in di hospitaalbed sien dan dink ek aan my eie dogter. Slegs een dag in so n hospitaalbed, skaar kans gehad om sin te maak van als, toe di Here haar kom haal het. Goeie nuus want sys Huis toe, maar die seer. Dis onbeskryflik.

Annalize Pienaar ·

Ons God is groot. Wonderwerke elke dag in ons lewens.

Cora Simpson ·

Hierdie hele wonderwerk is vir my so spesiaal. Was gister beroof. Handsak met my alles weg. geen Id lisensie ens. Het onmiddelik gevoel ek is verlaat. Dankie Marzanne ek kry nou skaam om te dink ek myself is so kleingelowig. Nou besef ek God is altyd daar.

Gesiggie ·

Prys die Here,,, vir die wonderwerk”’ God is Good… so baie bly dat die seuntjie se lewe gespaar is.

Eish ·

My God is so groot, so sterk en so magtig, daars niks wat my God nie kan doen! (Oorgeneem)

Erasmus ·

Ons as familie is ook deur so ‘n trama 4 jaar terug toe my oudste broer se klein seun ook in ‘n swembad geval het< God het hom ook vir ons terug gee, so ek weet wat hulle deur gegaan , en regtig ons dien 'n lewende God wat Groot is.

God Is Groot

Leon ·

Net weereens die besef van God se Grootheid en Genade en dat enigiets moontlik is vir Hom–solank ons bly glo, sal Hy voorsien!!!

Adel ·

Amen en alle eer aan ons Hemelse Vader, so dankbaar die seuntjie is okay en dat sy mamma nou vertel van God se Almag en Glorie. Bid julle ñ lang en veilige lewe saam. So ñ pragtige gesinnetjie. xxxx

LK ·

Die Here laat sulke goed gebeur sodat ons as mens kan sien Hy bestaan in al sy glorie. Ek is saam met jul verheug dat Myburgh ok is. Hy is reg die Here ons God is oral.

Maria ·

My trane loop dit is verseker …….wonderwerke bestaan nog…dit GOD se wil geskied. Dankie Here

Riekie Fleuriot ·

Prys ons Koning Jesus! Dit is so wonderlik om God te ken en weet Hy is daar vir ons. Dankie Jesus vir volle genesing vir klein Myburgh, ons loof en prys U daarvoor. Geniet julle pragtige kindertjies!

Daleen ·

Die Heer se genade is GROOT!!!! HY is die enigste Redder wat ons het, vertrou net op Sy genade elke dag. Die Here se so duidelik aan ons dat Hy ons nooit alleen sal los nie. Dis ‘n wonderlike verhaal

Charms ·

Alle lof en eer kom Hom toe.. Ons God is groot, dankie Here dat U weereens n kindjie kon gebruik om aan ons te bewys dat daar niemand soos U is nie..

Wie weet ·

ons kyk op na die berge waar sal ons hulp vandaan kom Ons hulp kom van God die vader wat als geskape het Dankie vir die getuienis ons aanbid n Lewendige God Amen

Hallelujah ·

Sing Hallelujah in Jesus se naam. Tielman jy is ‘n amazing storie. God lewe in water ook, hy lewe in ons donkerste oomblikke ook. Hy is daar om enige iemand op te tel. Hy is daar.
Amen ons God Amen.

Almarie ·

Prys Die Here, Hy is groot. Ons moet net glo , al kan ons Hom nie sien nie, Hy is daar vir Sy kinders.

Liezl ·

Dankie vir al 62 kommentare wat so ons Vader eer en prys en aanbid. As elkeen van julle die wonderwerke in jul eie lewens sien en ervaar en uitdra en leef, dan het ek hoop vir ons land. Kom ons vat hande en bid vir mekaar. Seën en liefde vir julle almal. Wat ‘n kragtige storie wat ons Vader hier bymekaar gebring het. Loof Hom

hercu ·

die HeiligeGees is ons beste vriend, vertrooster en wonderwerk maker!

Marzanne, jy is ‘n mamma 1000 en laat my dink aan die vrou van Spreuke 31

Myburgh, baie sterkte en ek bid vir julle gesin!

Willem ·

Hoe groot is ons God! Al die lof en die eer kom Hom toe en Hy deel dit met geen mens! Prys Sy Heilige naam!

Anne-Marié ·

Wat ‘n wonderlike getuienis. So lekker om goeie nuus te lees. Kindertjies kyk so eerlik en onskuldig na God. Ons kan almal leer by hierdie seuntjie. Sy gesprek oor water aan die einde… wow! Kinders glo sonder vrae en twyfel. Grootmense kan maar agslaan. God is goed. Mense sterf ook en rampe tref ons ook maar God verlaat ons nie. Hy dra ons deur alles.

Alida ·

Dankie Vader… So só dankbaar saam met julle! Dit leer ons net weer: moet NOOIT moed opgee nie, want God is ALMAGTIG. Selfs in die ergste, slegste, aakligste situasie. Bid, roep Hom aan, glo. Hy is God. As Hy so besluit, KAN Hy ALLES volkome herstel.

Rina Rossouw ·

Kan u asb kyk of my brief opgespoor kan word- net voor ek hom stuur…het hy verdwyn…

Nicoleen Carter ·

Aan hierdie mamma will ek net se dat dit wondelik is hoe ons geloof en ons moederlike instinkte n mens lei op daardie bittere oomblik. My babetjie was 3 maande oud toe sy outistiese ouer boetie hom in die middel van die swembad gelos het. Ek is minute later oor n heining wat ek nie eers op 16 en fiks loshande sou Kon oor nie. Liewe Jesus beskerm jou kind mamma. Help jouself nou. Post traumatic stress syndrome is REAL

Elrinda ·

Ons dien n almagtige God, enige iets is moontlik!!! Wonderlike nuus!!!!

Willie Horn ·

Wonderbaar!!!! .
Maar wat vd talle gevalle waar daar geen wonderwerk plaasgevind het nie. Hoe troos ons diesulkes?

Dina ·

Dankie vir hierdie wonderlike getuienis. Ons God is groot en almagtig.

Jacques van den Berg ·

Dankie die Here vir so ‘n moeder wat na aan die Here leef. Hy het haar en haar besonder begaafde seun met sy wonderlike innemenheid duidelik baie lief en het hulle albei deurgedra. Prys sy Heilige Naam.

Samantha ·

Dit is so wonderlik, en waste storie was dit nie om te lees nie. Wonderbaarlik Groot.

Anoniem ·

Watse Hospitaal en ambulans diens was so behulpsaam? Ons het 2 jaar terug my kleinseun 20maande( 3dae voor hy 21 maande sou gewees het) ook in so frats ongeluk verloor. Dit het “n ambulaans diens 20 minute na ‘n halfuur gevat om by my dogter uit te kom. By die hospitaal gekom wou die verpleegstaf glad nie help nie want jy moes eers betaal voor hulle enigiets vir my kleinseun sou probeer doen… het hom nie eers CPR gegee of iets probeer nie…net gesê dit is te laat hy is klaar dood. En so het ek ook daardie dag nie net my kleinseun verloor nie maar ook my dogter en ander kleinseun.

Kobus ·

Willie Horn
Daar is nie ‘n vinnige en maklike antwoord op jou vraag nie en hoewel ek dit effe sal toelig sal dit baie studie verg om te verstaan.
Vir diegene wat redding ontvang is die dood ‘n verlossing, of dit nou voor geboorte is of teen 100-jarige leeftyd, dit bly ‘n verlossing, soveel te meer in die verderfde tyd waarin ons leef. Van die “talle gevalle” waarmee so ‘n lewensreddende wonderwerk nie gebeur het nie beteken geensins dat die verlossing nie dalk juis groter was nie.
Die teendeel is ook waar, vir diegene wat nie ewige verlossing kry nie is daar ewige verderwing.
Wie gered word aldan nie, weet ons nie. Ons mag egter nie oordeel nie en ook nie regverdig spreek nie, dit is alleenlik God se besluit.
As jy dit beter wil verstaan begin by die Wet van God Exodus 20 (en moenie dink 1 van ons het die volle begrip van díe Wet nie). Kyk dan veral in die 4 Evangelies in die Nuwe Testament wat sê Jesus oor ons verhouding met Hom en Sy Wet (Johannes Evangelie spreek dit veral goed aan). Wat Jesus self leer is anders as wat ons samelewing leer, leer by Hom en probeer leef soos Hy sê en Hy sal jou ‘n duidelike antwoord gee op jou vraag.

Wonderlik om die geloofsgroei by ons mense te sien deurdat die onmoontlike al meer gereeld in ons fisiese wêreld manifisteer. Ons is saam met Myburgh se gesin verheug en dankbaar.

Marlene Hanekom ·

Amen HallejuYAH. Al die lof en eer aan os Skepper Vader vir Sy wonderdade en genade.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.