Ma vra gebede vir dogter, toe sterf haar man

Cindy en Marc Benson. Hulle is die sangeres, Candy Benson, se ouers. (Foto: Facebook)

Covid-19 het Woensdag die lewe van Marc Benson, pa van die sangeres Candy Benson, geëis.

Marc en sy vrou, Cindy, het nog verlede maand gepleit om gebede vir Candy, hul “sonskynkind”, wat op Saterdag 11 Julie per ambulans na die Netcare Olivedale-hospitaal gehaas is. Candy (30) veg steeds om haar lewe teen Covid-19.

Sy is 24 dae lank in die hoësorgeenheid behandel voordat sy verlede Dinsdag na ʼn algemene saal oorgeplaas is. Sy sterk steeds in dié hospitaal aan.

Cindy het Woensdag in ʼn roerende Facebook-huldeblyk aan haar man gesê hy was haar eerste liefde.

“Ek gaan jou mis met elke klop van my hart. Jy was my beste vriend, my alles. Ek voel nog steeds asof ek binnekort gaan wakker word uit hierdie nagmerrie, waar jy tuis sal wees en ons dogter uit die hospitaal, en ons weer ʼn gesin sal wees.”

Cindy sê dat sy nie weet wat sy en Candy sonder hulle “Daddles” gaan doen nie. “Ons het nog soveel planne vir die toekoms gehad en ons wou nog soveel dinge saam doen. Totdat hierdie Covid-satansiekte sy greep op ons dogter gekry het en haar in die hospitaal laat beland het (dag 32) en jou binne twee dae gevat het [sic].

Marc Benson. (Foto: Facebook)

“God het nog ʼn engel nodig gehad; ʼn man met ʼn hart van goud wat altyd ander gehelp het. Jy was die liefde van my lewe.”

Cindy het verlede week gesê Candy ly nou aan ʼn steroïede psigose van die hoë volumes steroïede wat sy ontvang om haar longe te versterk. Cindy sê sy is juis oorgeplaas na ʼn algemene saal in ʼn poging om haar geestesgesondheid te verbeter.

“Candy is ongelooflik deurmekaar; dit is ʼn nagmerrie,” het Cindy gesê.

Woensdag is Candy se 32ste dag in die hospitaal. “Ek is so bang, maar ek weet ons Vader gaan haar gesond huis toe bring. Ons pleit steeds by mense om saam met ons vir ons kind te bid,” het Cindy verlede week gesê.