Machadodorp-video: ‘Slagoffer’ glo deel van aanranding

‘n Skermskoot uit die video.

Die man wat volgens ʼn wydverspreide video hardhandig deur twee veiligheidswagte na ʼn bakkie gesleep is, was na bewering oomblikke vantevore deel van ʼn groep wat ʼn werknemer van ʼn plaaslike onderneming aangerand het.

Maroela Media het vroeër berig die video waarin gesien kan word hoe twee veiligheidswagte ʼn oënskynlik beseerde man in Machadodorp in Mpumalanga na ʼn bakkie sleep, het wyd opslae veroorsaak nadat dit op sosiale media aan die lig gekom het. Die twee veiligheidswagte, Bruce Botha (29) en Wayne Swart (20), is gevolglik van aanranding met die doel om ernstig te beseer aangekla.

Brig. Leonard Hlathi, woordvoerder van die polisie, het egter aan Maroela Media bevestig dat ʼn klag van aanranding ook by die polisie gelê is teen die man wat in die video aangekeer word.

Volgens Hlathi is Botha en Swart Maandagmiddag deur Ridwaan Ismail, ʼn plaaslike sakeman, na die toneel ontbied. Daar word beweer dat die derde man in die video en sy makker een van Ismail se werknemers aangerand het en Botha en Swart ontbied is om dié bakleiery stop te sit.

Ismail het aan TimesLIVE gesê sy werknemer is deur drie mans aangeval toe hy verby ʼn huis geloop het waar Ismail besig was om ʼn vrou wat ʼn eiendom gekoop het, maar nie daarvoor betaal het nie, van die eiendom te verwyder.

Toe Botha en Swart, glo lede van die plaaslike buurtwag, opdaag om die situasie onder beheer te bring, het die plaaslike gemeenskap woedend reageer. Dit is ook een van die omstanders wat toe die video gemaak het.

In die video kan gesien word hoe die vermeende moeilikheidmaker hardhandig aan sy arms na ʼn bakkie gesleep en agterop geplaas word. Lede van die publiek raak al hoe vuriger en skree onder meer vir die twee mans: “Is julle polisiebeamptes?”

Omstanders probeer ook om die man uit die twee veiligheidswagte se greep te bevry. Die polisie daag by die toneel op en die video eindig te midde van die lede van die publiek se woedende uitroepe.

Botha en Swart is later die dag, vermoedelik ná ʼn opdrag van die stasiebevelvoerder, in hegtenis geneem. Plaaslike inwoners het daarna chaos veroorsaak deur die oprit na die polisiestasie te blokkeer en Ismail se winkel aan die brand te steek, terwyl hulle daarop aangedring het om te weet waar Botha en Swart aangehou word.

Twee vragmotors is ook Dinsdagaand aan die brand gesteek.

ʼn Klag van brandstigting en intimidasie wat deur Ismail aanhangig gemaak is, word ondersoek.

Maroela Media het vroeër berig Botha en Swart het reeds in die hof verskyn op aanklag van aanranding met die doel om ernstig te beseer en sal Vrydag weer in die rondgaande hof in Belfast verskyn.

Die ANC het intussen op die voorval gereageer en gesê hy is geskok oor die “walglike, kriminele optrede van twee wit mans waar hulle ʼn swart man brutaal aanrand”. Die party het ook die voorval as ʼn “rasgemotiveerde aanval” bestempel.

Die ANC het die optrede van die gemeenskap wat die winkel en die vragmotors aan die brand gesteek het veroordeel.

Hlathi het bevestig die dorp was Donderdag weer rustig, maar dat die polisie die situasie steeds fyn dophou. “Die gemeenskap het gister ʼn memorandum met griewe by die polisiestasie oorhandig,” het hy gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
Freddie

Die land het geen chill.

Paul

Ek het ‘n idee net swart mense mag vorentoe wetstoepassers wees. As hulle jou sou sleep is die wind uit die seile van die hele land geneem. maar dan kom dit by my op, wat maak ons met die ander beroepe in die res van die land?

Wonder

Hoekom is die brandstigters ook nie gearesstreer nie maar net veroordeel???
Sal hulle ook in die hof verskyn???
Is die Polisie te bang vir hulle??

Mielie

Die ANC leef in “fools paradise”…..Heel gepas met hulle denkwyses. Mens kan net lag.

Gert

Wat as dit anders om was. So die twee ander kleuriges ook aangekla word. Kriminele pas mekaar op